АҚШнинг Ф-16 қирувчи самолёти президент Дональд Трампнинг голф клуби устидаги вақтинча ёпиқ ҳаво ҳудудига кирган енгил фуқаролик самолётини тутиб олди. Бу ҳақда Reuters хабар берди.
Ҳодиса Нью-Жерси штатининг Бедминстер шаҳридаги ҳаво ҳудудида юз берган. Бу 5 июль куни ёпиқ ҳаво ҳудудига рухсатсиз кирилган бешинчи ҳолат бўлган. Йўловчи самолётининг эътиборини тортиш учун “бош билан зарба бериш” (ҳеадбутт манеувер) деб аталадиган манёвр амалга оширилган. Шундан сўнг самолёт чекланган ҳудуддан хавфсиз чиқариб юборилган.
АҚШнинг ҳаво-ҳудуди мудофааси қўмондонлиги сўнгги ҳафталарда шунга ўхшаш бир нечта ҳодисани қайд этган. Умумий авиация учувчиларидан ҳудудда парвоз қилишдан олдин барча огоҳлантиришларни синчиклаб текшириш талаб этилмоқда.
Маълумот ўрнида, Дональд Трамп сайлов кампанияси давомида иккита суиқасдга уринишга дуч келганди. 13 июль куни Пенсилваниядаги митингда сиёсатчи қулоғидан яраланганди, тадбир иштирокчиларидан бири ҳалок бўлган, яна икки киши жароҳатланган. Жиноятда гумон қилинаётган 20 ёшли Томас Метю Круксни Махфий хизмат йўқ қилган.
Республикачига иккинчи марта суиқасд қилиш ҳаракати 15 сентябрь куни Флорида штатидаги голф клуби яқинида содир бўлган. Махфий хизмат ходимлари буталар орасида яширинган 58 ёшли Райан Раутга қарата ўт очган. Воқеа жойидан автомобилда қочиб кетмоқчи бўлган эркак ушланган. Ҳодиса жойида нишонли АК-47 автомати, иккита рюкзак ва GoPro камераси топилган. Раут қотилликка тайёргарлик кўришда айбланган.
Изоҳ (0)