Касалланганлар ва вафот этганлар
Америкалик актёр Том Хенкс ва унинг рафиқаси Рита коронавирус инфекцияси билан касалланди. Бу ҳақда актёрнинг ўзи Twitter’даги саҳифасида хабар қолдирган.
«Ҳаммасини тўғри қилиш учун — ҳозир шундай қилиш шарт — биз коронавирусга таҳлил топширдик», — деб ёзган Хенкс. Унинг сўзларига кўра, таҳлил натижалари уларда коронавирус инфекцияси борлигини кўрсатган.
Жанубий Кореяда сўнгги бир сутка ичида коронавирус инфекциясини юқтириб олиш билан боғлиқ 114 та янги ҳолат қайд этилди. Март ойидан буён касалланганларнинг умумий сони 7869 кишига, қурбонлар сони эса 66 кишига етди.
Арманистонда коронавирус билан касалланиш бўйича учта янги ҳолат қайд этилди. «Афсуски, бугун мамлакатда коронавирус юқтириб олиш бўйича учта янги ҳолат кузатилди. Икки нафар (уларнинг ёши мос равишда 45 ва 27 да) Арманистон фуқароси ҳамда мамлакатда ишловчи Италия фуқаросида (51 ёш) касаллик борлиги аниқланган. Учала одамнинг ҳам яқинда Италиядан келгани маълум бўлди», — деб ёзган Арманистон бош вазири Facebook’даги саҳифасида.
Хитой ҳудудида коронавирусни юқтирганларнинг умумий сони 80 793 кишини ташкил этиб, улардан 62 793 нафари соғайишга муваффақ бўлган. Эпидемия мамлакатнинг 3169 фуқаросини ҳаётдан олиб кетган. Сўнгги кунларда бутун мамлакат бўйлаб коронавирусга чалиниш билан боғлиқ 15 та янги ҳолат аниқланган. Улардан олтитасида коронавирус Хитой ташқарисида юқтирилган, яна саккизта ҳолат эса Хубэйда қайд этилган.
Ўзбекистондаги вазият
Ўзбекистон Президенти Шавкат Мирзиёев 11 март, чоршанба куни, мамлакатда жамоат саломатлигини таъминлаш тизими самарадорлигини ошириш муҳокамасига бағишланган йиғилиш ўтказди.
Коронавирус ҳақида халқимиз билиши керак. Бутун дунё бўйлаб 100 дан ортиқ давлатда аломатлари аниқланди, десак тўғри бўлади. Мана, Европада жуда кучайиб кетяпти. Шунинг учун коронавирусга қарши эътиборни икки карра кўпайтирмасак, огоҳ бўлмасак, бу хавф-хатар иқтисодиётниям, сиёсатниям жой-жойига қўядиган вақт келган.Йиғилишда давлат раҳбари коронавирусга қарши кураш бўйича Соғлиқни сақлаш вазирлиги ҳамда Санитария-эпидемиологик осойишталик агентлигига бир қатор топшириқлар берган.Шавкат Мирзиёев, Ўзбекистон Президенти
Ўзбекистон Россиядан коронавирусни аниқловчи тест тизимларини олди. Қайд этилишича, коронавирус тарқалиши муносабати билан Роспотребнадзор эпидемиологик вазиятни мониторинг қилиш ва ёрдамга муҳтож давлатларга кўмак бериш мақсадида Евросиё иқтисодий иттифоқи (ЕОИИ)га аъзо мамлакатлар, Ўзбекистон, Озарбайжон, Тожикистон, Туркманистон, Мўғулистон, Хитой ва Эронга тест тизимларини бепул юборган.
Жаҳон соғлиқни сақлаш ташкилотининг Ўзбекистондаги ваколатхонаси раҳбари Лианне Куппенс «Ўзбекистонга коронавируснинг кириб келиш эҳтимоли юқори эканини қайд этди. Куппенснинг сўзларига кўра, айни вақтда Ўзбекистондаги аҳоли вакилларида коронавирусга чалиниш ҳолатлари аниқланмаган. «Вирус юқумли бўлгани ва 6 та қитъани зарарлагани сабабли унинг яқин орада Ўзбекистонга кириб келиши эҳтимоли юқори», — дея таъкидлаган ЖССТ вакили.
Россиянинг Яҳудий автоном вилоятида баҳорги дала ишларига жалб қилиниши режалаштирилган хитойлик ишчилар ўрнини коронавирус сабабли ўзбекистонлик ишчилар эгаллайди. Қайд этилишича, вилоят расмийлари коронавирус сабабли баҳорги дала ишларига кела олмайдиган 1,3 минг нафар хитойлик ишчи ўрнига ўзбекистонлик ишчиларни жалб қилишни режалаштирмоқда.
Жаҳондаги вазият
Қозоғистонда ўтказилиши режалаштирилган оммавий тадбирлар коронавирус туфайли бекор қилинади. «ЖССТ коронавирус пандемиясини эълон қилди. Ҳукумат махсус профилактика чораларини амалга оширишга киришди. Оммавий тадбирлар бекор қилинади. Озиқ-овқат ва биринчи эҳтиёж учун зарур бўлган товарлар билан таъминлашда узилишлар бўлмайди. Кичик ва ўрта бизнес зарар кўришининг олдини олиш муҳим», — деб ёзади Тўқаев Twitter’да.Шунигдек, коронавирус хавфи туфайли Қозоғистонда мактаб ўқувчилари муддатидан аввал таътилга чиқадиган бўлди. Бу ҳақда бош вазир ўринбосари Эрали Тугжанов маълум қилган.
Қирғизистон бош вазири мамлакатда коронавирус тарқалишининг олдини олиш мақсадида оммавий тадбирлар ўтказишни тақиқлаш бўйича қарор имзолади.
Туркия ҳукумати туроператорларга 2019-nCoV коронавируси тарқалиши муносабати билан сайёҳлик мавсумини бошлашга шошилмасликни тавсия қилди. Мамлакат туризм ва маданият вазирлиги меҳмонхона ва сайёҳлик фирмаларига мавсумни март ойидан эмас, апрель ойи охиридан бошлашни таклиф қилди.
Эрон ҳукумати Халқаро валюта жамғармасига (ХВЖ) коронавирус эпидемияси туфайли 5 миллиард доллар беришни сўраб, мурожаат қилди.
АҚШда янги турдаги COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилди. Тақиқ Буюк Британия учун истисно қилинади. «Янги тартиб-қоидалар 13 март куни ярим тундан кучга киради», — дейди Трамп.
Жаҳон соғлиқни сақлаш ташкилоти раҳбари Тедрос Гебрейесус коронавирус билан боғлиқ вазият пандемия даражасига чиққанини маълум қилди. Сўнгги икки ҳафта давомида Хитойдан ташқарида коронавирус билан зарарланиш ҳолатлари сони 13 мартага ошди, касаллик қайд этилган мамлакатлар сони эса уч баравар кўпайди.
Маълумот учун, пандемия эпидемик касалликнинг бир ёки бир неча мамлакат, қитъа ёки континентда ёппасига тарқалиши ҳисобланади. Пандемик тарқалиш ҳаво-томчи йўли билан юқиб, инкубацион даври қисқа юқумли касалликларга хос.
Кўришни қатъий тавсия қиламиз: Коронавирус бўйича мажлис ўтказган Мирзиёев, 10 минг кишини бошпанасиз қолдирган ёнғин, Фукусима фожиасининг 9 йиллиги. 11 март суратлари
Туриннинг «Ювентус» клуби ҳимоячиси Даниэле Ругани коронавирус билан оғригани аниқланди. 25 ёшли Ругани коронавирус бўйича тест топширган ва тест натижалари ижобий натижа тақдим этган.
Шунингдек, коронавирус сабаб «Интер» ҳамда «Рома»нинг Европа Лигасидаги ўйинлари қолдирилди. Мазкур икки баҳс 12 март, пайшанба куни, ўтказилиши керак эди.
Италияда коронавирус сабаб дўконлар, бар ва ресторанлар ёпилади. Сотувда фақат озиқ-овқат ва дори-дармон қолади. «Бошқариш — 360 даражада атрофни кўра билиш дегани. Ушбу чақирув фуқароларимиз соғлиғига боғлиқ эканлигини яхши биламиз. Бу чақирув соғлиқни сақлаш тизимимиз учун қаттиқ синов бўлмоқда», — дейди бош вазир ўз мурожаатида.
Ла Лига ўйинлари икки ҳафтага тўхтатилди. Бунга «Реал» клуби карантинга олингани сабаб қилиб кўрсатилмоқда. Мадридликлар клуби расмий сайтининг маълум қилишича, «Реал» баскетбол жамоасининг аъзоси COVID-19 вирусини юқтириб олган. Шу сабабли «Реал»нинг баскетбол ва футбол жамоалари карантинга олинган.
Умуман олганда, коронавирус сабаб дунё бўйлаб спорт мусобақалари бекор қилинмоқда. Қуйида шу кунга қадар бекор қилинган халқаро спорт мусобақалари, шунингдек, коронавируснинг умуман спорт соҳасига таъсири ҳақида сўнгги маълумотлар тақдим этилади.
Москва мэрияси коронавирус сабаб кузатувга олинган одамлар сони ҳақида маълумот берди. «Улар нафақат яқин дўст ва қариндошлар, самолёт рейсларининг йўловчилари, шунингдек, такси ҳайдовчилари, курьерлар ва бошқа касб вакиллари», — дея вазиятга изоҳ берган Москва шаҳри мэри ўринбосари Анастасия Ракова.
Кувайт ҳукумати янги турдаги коронавируснинг тарқалиш хавфи муносабати билан вазирлик ва давлат ташкилотлари фаолиятини 12—26 март оралиғида тўхтатиб туришга қарор қилди. Ҳукумат баёнотидан сўнг мамлакат банклар ассоциацияси ҳам кўрсатилган муддатда банклар ҳам ишламаслигини маълум қилди.
Ҳар куни кечқурун фақат битта хабар жўнатамиз. «Дарё» оқшоми — кун давомида рўй берган барча воқеа-ҳодисалар дайжести Telegram-канали: @daryooqshomi
Изоҳ (0)