АҚШ президенти Дональд Трамп Эроннинг ўз ядро дастури бўйича халқаро текширувлар ўтказилишига розилик бермагани ва уранни бойитишдан воз кечмаганини маълум қилди. Бу ҳақда у Оқ уйда Мустақиллик куни нишонланганидан сўнг, Нью Жерсига йўл олаётган самолётда журналистларга айтиб ўтган.

“Менимча, уларнинг дастури бутунлай тўхтатилган. Агар улар яна бошлашга уринишса, эҳтимол, бошқа объектда бўлади. Агар бошлашса, бу муаммога айланади”, деди Трамп.
Трампнинг айтишича, душанба куни Исроил бош вазири Биньямин Нетаньяхунинг Вашингтонга ташрифи чоғида у билан Эрон ядро масаласини муҳокама қилади. Шунингдек, президент Эрон ядро дастурининг қайта тикланишига йўл қўймаслигини таъкидлаб, Теҳрон гўёки у билан музокараларга тайёрлигини билдираётганини қўшимча қилган.
Бундан аввал Эрон парламенти аллақачон ядро инфратузилмасининг хавфсизлиги ва дахлсизлиги кафолатланмагунча Халқаро атом энергияси агентлиги (МАГАТЭ) билан ҳамкорликни тўхтатиб туриш тўғрисидаги қонунни қабул қилганди.
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)