Эрон Олий раҳбари Оятуллоҳ Али Хоманаий Исроил Исроил унинг мамлакатига ҳужум қилиб, 12 кунлик уруш олиб борганидан бери илк бор жамоатчилик олдида кўриниш берди.
Давлат телевидениеси намойиш этган видеода 86 ёшли Хоманаий Теҳрондаги масжидга боргани, эронликлар эса уларни олқишлар билан қарши олгани акс этган.
Қора либосда кўриниш берган Хоманаийни одамлар “Томирларимиздаги қон етакчимиз учун!”, деган шиорлар билан кутиб олди. Давлат телеканали маросим Эрон пойтахтидаги Имом Хомейни масжидида бўлиб ўтганини тасдиқлади.
Али Хоманаий 1989 йилдан бери ҳокимият тепасида. У Исроил томонидан 13 июнь куни бошланган ҳужумлардан буён жамоатчиликка кўриниш бермаётган эди. Эрон олий раҳбари охирги бор 12 кунлик урушдан икки кун аввал парламент аъзолари билан учрашган.
Теҳрон эълон қилган маълумотларга кўра, Исроил ҳужумлари натижасида 900 дан ортиқ эронлик ҳалок бўлган. Бунга жавобан Эрон ҳам Исроилга ракета зарбаси берди. Натижада камида 28 нафар исроиллик ўлган.
Қўшма Штатлар ҳам можародан четда қолмади. У Эроннинг учта ядровий объектига зарба берди. Дональд Трамп ҳужумлар Эроннинг ядро имкониятларини “буткул йўқ қилганини” даъво қилди.
Бироқ БМТ Халқаро атом энергияси агентлиги МАГАТЭ раҳбари Рафаэл Гросси ўтган ҳафта баёнот бериб, Эрон бир неча ой ичида уранни бойитишни қайта йўлга қўйиши мумкинлигини айтди. Унинг сўзларига кўра, ҳужумлар сезиларли зарар етказган бўлса-да, Эрон ҳануз бундай потенциалга эга.
Изоҳ (0)