Америкалик миллиардер Илон Маск АҚШ Федерал қидирув бюроси (ФҚБ)нинг молиячиси Жеффри Эпштейн иши бўйича ҳисоботини кинояли мем орқали масхаралади. У ўз фикрини Х ижтимоий тармоғида эълон қилди.
7 июль куни Axios нашри АҚШ Адлия вазирлиги ва Федерал тергов бюроси жинсий жиноятлар учун судланган молиячи Жеффри Эпштейннинг нуфузли одамларни шантаж қилгани ва “мижозлар рўйхати”ни юритганига оид далилларни топа олмагани ҳақида хабар берди.
Бунга жавобан Маск мем эълон қилди. Ушбу мемда Маск “Эпштейн рўйхати” деб номланган ҳужжатни эълон қилиш жараёнининг чўзилиб кетганини киноя билан тасвирлайди. У бунда кўплаб кечикишлар ва шаффофлик етишмаслигига ишора қилган.
Унинг таъкидлашича, идораларнинг “Эпштейн рўйхати” мавжуд эмаслиги ҳақидаги хулосаси уни махфийликдан чиқариш бўйича аввал берилган ваъдаларга зид ҳисобланади.
“Эпштейн рўйхатини эълон қиламиз. Бизга фақат кўпроқ вақт керак. Эпштейн рўйхати менинг стол устимда турибди. Бу ерда Эпштейн рўйхати йўқ”, дейилади мемда.
Маск 6 июль куни Х тармоғида республикачилар ва демократларнинг “Ягона партияси”га қарши чиқиш учун янги партия тузганини эълон қилганди. АҚШ президенти Дональд Трамп миллиардер Илон Маскнинг янги “Америка” партиясини “аҳмоқона” дея баҳолади.
Изоҳ (0)