Тошкент вилоятида 7 ёшли бола онаси ва ўгай отаси томонидан калтакланди. Бу ҳақда болалар омбудсмани хабар берди.
Унга кўра, болалар омбудсманига Юқори Чирчиқ туманида яшовчи вояга етмаган Г.И. (2018 йилда туғилган ўғил бола)га оид мурожаат келиб тушди. Мурожаатга асосан жорий йилнинг 30 июнь куни 7 ёшли бола онаси ва ўгай отаси унга қўпол муомала қилиши ва калтаклагани туфайли ярим тунда уйидан қочиб чиқиб кетиб, қўшни дала ҳовли дарвозасини тақиллатган ва ёрдам сўраган.
Болалар омбудсмани сўрови асосида ушбу ҳудуд “Инсон” ижтимоий хизмати маркази томонидан ҳолат ўрганилди. Вояга етмаган Г.И.нинг онаси Г.К. (1995 йилда туғилган аёл) билан суҳбатлашилиб, вазият юзасидан зарур чоралар кўрилди.
Г.И.нинг онаси фарзандини тарбиялаш борасидаги мажбуриятини бажармагани учун Маъмурий жавобгарлик тўғрисидаги кодекснинг 47-моддаси 1-қисми билан маъмурий жавобгарликка тортилди.
Шунингдек, онага ва ўгай отага “Болаларни зўравонликнинг барча шаклларидан ҳимоя қилиш” тўғрисидаги қонун доирасида бола давлат ҳимоясида экани тушунтирилиб, унга нисбатан қилинган ҳар бир ножўя ҳаракат жавобгарликка олиб келиши тўғрисида огоҳлантирилди.
Мазкур оилага оид ижтимоий кейс очилиб, болани ҳимоялаш чоралари кўрилмоқда.
2025 йил бошларида Тошкент вилоятида онаси томонидан калтакланган 4 ёшли қиз вафот этганди. Ҳолат юзасидан жиноят иши қўзғатилиб, аёл қамоққа олинган. 27 январь куни Тошкент вилоятида қайнона-келин жанжали сабаб чақалоқ куйиб қолганди. Олмалиқда аёл ширинликларни рухсатсиз еган боласининг тана аъзоларига пахта тиқиб, ёққани ҳақида ҳам хабар берилганди.
2024 йил 14 ноябрда “Болаларни зўравонликнинг барча шаклларидан ҳимоя қилиш тўғрисида”ги қонун қабул қилинганди. Қонун 2025 йил 15 майдан кучга киради. Унда болаларни зўравонликнинг барча шаклларидан ҳимоя қилиш бўйича умумий ва индивидуал чора-тадбирлар белгилаб берилган.
Изоҳ (0)