Ijtimoiy tarmoqlarda bir ayol uydagi shirinlikni ruxsatsiz yegan bolasining qo‘lini kuydirgani haqida xabarlar tarqaldi. Holat yuzasidan bolalar ombudsmani munosabat bildirdi.
Unda aytilishicha, holat bolalar ombudsmani tomonidan nazoratga olingan. X.A. (1991-yilda tug‘ilgan ayol) 2024-yil 30-oktyabr kuni 8 yoshli o‘g‘li B.A. (2016-yilda tug‘ilgan) uydagi shirinliklarni ruxsatsiz yegani sababli uni go‘yoki jazolash maqsadida barmoqlari orasi va boshqa tana a’zolariga paxta tiqib, yoqqan.
Buning natijasida esa bola tanasida 1- va 2-darajadagi kuyish yuzaga kelib, u yengil tan jarohati olgan.
Olmaliq shahar IIB tomonidan X.A.ga nisbatan Jinoyat kodeksining 110-moddasi (qiynash) 2-qismi “a” bandi bo‘yicha jinoyat ishi qo‘zg‘atilgan va yashiringani tufayli unga qidiruv e’lon qilingan. Joriy yilning 7-fevral kuni ayol protsessual tartibda ushlanib, unga tegishli sud ajrimi asosida qamoq ehtiyot chorasi qo‘llandi.
Qayd etilishicha, bolalar ombudsmani mazkur holat yuzasidan bola manfaatlari nuqtayi nazaridan o‘z kuzatuvini davom ettiradi.
Ma’lumot uchun, Jinoyat kodeksining 110-moddasi 2-qismi “a” bandida nazarda tutilgan jinoyat uchun 360 soatdan 480 soatgacha majburiy jamoat ishlari yoki 2 yildan 3 yilgacha axloq tuzatish ishlari yoxud 2 yildan 5 yilgacha ozodlikni cheklash yoki 5 yilgacha ozodlikdan mahrum qilish jazosi qo‘llanadi.
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolagani haqida xabarlar tarqalgandi. Surishtiruv davomida yuqoridagi holat tasdig‘ini topmagan. Sirdaryoda ikki o‘quvchi qiz o‘qituvchini urgani aks etgan video tarqaldi. Holat viloyat Maktabgacha va maktab ta’limi boshqarmasi va soha mas’ullari nazoratiga olindi.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Izoh (0)