Ёзги таътил бу болаларнинг мактабдан дам олиб, ёрқин ҳис-туйғулар ва кутилмаган кўникмалар оламига шўнғиши учун ажойиб фурсат ҳисобланади. Фильм томоша қилиш бўш вақтни мазмунли ўтказишнинг энг яхши усулларидан биридир. Кино уларга нафақат кўнгилочар, балки бошқа оламларга эшик очувчи портал бўлиб, ажойиб қаҳрамонлар билан учрашиб, ҳайратланарли саргузаштларни бошдан кечириш имконини беради. Мақолада минглаб томошабинлар томонидан синовдан ўтган фильмлар рўйхати ҳақида сўз боради.
“Нарния салтанати: арслон, сеҳргар аёл ва сеҳрли шкаф”
2005 йилда режиссёр Эндрю Адамсон томонидан суратга олинган эпик фантазия фильмнинг асосий манбаси Клайв Луиснинг шу номли китобидир. Фильмда бош қаҳрамонлар Питер, Сузан, Эдмунд ва Луси Певенси, улар беркинмачоқ ўйинини ўйнаётган пайтда тасодифан сеҳрли шкафни топишади. Шу шкаф орқали улар доимий қиш билан қопланган, ёвуз Оқ сеҳргар аёл ҳукмронлигидаги қорга бурканган Нарния салтанатига тушиб қолади.
Сюжет ёрқин образлар ва драматик бурилишларга бой. “Нарния салтанати: арслон, сеҳргар аёл ва сеҳрли шкаф” фильмининг яратувчилари деталларни жуда пухта ишлаб чиққан. Шунингдек, ўрта аср либослари ва безаклардан тортиб, мураккаб визуал эффектларгача, улар ёрдамида фантастик мавжудотлар жонланади ва улкан жанг саҳналари яратилади. Оқ сеҳргар аёл ролини ижро этган Тилда Свинтон совуқ харизмаси ва қатъиятли кўриниши билан томошабинларнинг ёдида қолган.
“Гарри Поттер”
“Гарри Поттер” фильмлари серияси XXI аср кинодаги энг ёрқин ва кенг кўламли ҳодисалардан биридир. Жоан Роулингнинг сеҳргар эканини билиб олган етим бола ҳақидаги ҳикоялари кўплаб оилалар учун ҳақиқий анъана бўлиб қолди.
2001 йилдан 2011 йилгача чиққан саккиз фильм босқичма-босқич Гарри ва унинг дўстларининг вояга етишини, қоронғи кучларга қарши курашини ҳамда ўтган воқелик ҳақидаги ҳақиқатни излашларини тасвирлайди. Асосий серия тугагач, 2016 йилда янги франшиза — “Фантастик махлуқлар” бошланиб, у Поттер оламидан 65 йил аввалги воқеаларни ёритади.
“Бетховен”
1992 йилда суратга олинган “Бетховен” номли оилавий комедия 2000 йилларда улғайганларнинг ёзги таътилида ажралмас қисмга айланган. Асосий қаҳрамон — катта ва самимий кўппак Бетховен, у кутилмаганда Ньютонлар оиласига келиб қўшилади. У тезда болаларнинг севимлисига айланиб, кўплаб хавфли вазиятлардан уларни қутқаради, бироқ ўзи ҳам баъзан муаммога дуч келади.
Брайан Левант режиссёрлиги остида яратилган фильм ўзининг самимий ҳазиллари, ҳаяжонли лаҳзалари ва тўрт оёқли бош қаҳрамонининг харизмаси билан ажралиб туради. “Бетховен” илиқ муҳит ва меҳрибон сюжети учун томошабинлар томонидан қадрланади.
“Сеҳрланган Элла”
2004 йилги романтик комедия Элла исмли қиз ҳақидаги воқеани ҳикоя қилади. Элла болаликдан ўзига хос характерга эга. У ҳар қандай сўров ёки буйруқни ўз хоҳиш-истаклари ва оқибатларидан қатъи назар бажаришга мажбур. Қиз лаънатдан қутулиш мақсадида пари Люсиндани излаб саёҳатга чиқишга аҳд қилади. Йўл давомида у ғаройиб ҳамроҳларга дуч келади: сўзлайдиган китоб, элф ҳамда тахтнинг жозибадор ва ақлли вориси бўлмиш шаҳзода Чар.
“Сеҳрланган Элла” асари Золушка ҳақидаги классик эртакни шунчаки қайта ҳикоя қилиш билан чекланмайди, балки ирода эркинлиги ва танлов қудрати мавзусига янгича қараш таклиф этади. Бош қаҳрамон киришимли ва жасур қиз бўлиб, у барча тўсиқларни енгиб ўтиб, ўз тақдири учун курашишни ўрганади.
“Малефисента”
2014 йилги Америка фантастик фильми классик “Уйқудаги гўзал” эртагини янгидан талқин қилди. Асосий сюжет Малефисента ҳақидаги ҳикоя атрофида айланади. У ботқоқликнинг сеҳрли оламида яшайди, болаликдан меҳрибон ва кучли бўлади, лекин хиёнат туфайли ҳаёти тубдан ўзгаради. Малефисента ғазабга тўлиб, қасос олишга сўз беради.
Режиссёр Роберт Стромбергнинг фильми қаҳрамонларнинг мураккаб муносабатлари билан ажралиб туради. Малефисента оддий ёвуз жодугарга ўхшамайди, у ролини оғриқ ва хиёнат билан очиб берадиган қаҳрамондир. Анжелина Жоли бош ролни ижро этиб, ваҳимали, лекин ҳамдардлик уйғотадиган образ яратган.
“Чарли ва шоколад фабрикаси”
Бош қаҳрамон Чарли Бакет камбағал оилада, кичкина кулбада ота-онаси, бувиси ва бувалари билан яшайди. Вилли Вонка эса шоколад фабрикасининг ғайриоддий эгаси бўлиб, ўз фабрикасига бориш ва умрбод ширинликлар билан таъминланиш имконини берувчи танлов эълон қилади. Танловда Чарли ғолиб бўлиб, ҳақиқий эртакнамо оламга тушиб қолади.
Фильм режиссёр Тим Бертоннинг бетакрор услуби, ноодатий саҳна безаклари ва ёдда қоладиган мусиқий чиқишлари билан ажралиб туради. Вонка ролидаги Жонни Депп сирли ва ғалати даҳога хос образни яратган бўлиб, томошабинда бир пайтнинг ўзида ҳамдардлик ва бир оз ҳайратни уйғотади. “Чарли ва шоколад фабрикаси” — меҳр, камтарлик ва оила қадриятлари ҳақида ҳикоя қилувчи эртакдир.
“Қатъий тартибли таътил”
Россиялик режиссёр Иван Поповнинг ушбу комедияси айнан болалар учун мўлжалланмаган бўлса-да, айниқса ўсмирлар ва болалигида ёзги лагерларни севганлар учун жуда ёқимли фильм ҳисобланади. “Қатъий тартибли таътил” — икки маҳбуснинг ноодатий ҳикояси бўлиб, улар қочқинликда болалар лагерига яширинади ва ўзларини сардорлар сифатида кўрсатишга мажбур бўлади.
Фильм ҳазил-мутойиба, иқтибослар ва совет давридаги “Омадли жентлменлар”, “Шурикнинг саргузаштлари” каби машҳур комедияларга ишоралар билан тўла. Бу турли оламлардан келган одамлар ўзаро тил топишга мажбур бўлган сценарий орқали инсоний муносабатларга самимий ва ҳаётий қарашдир. Қаҳрамонлар бир бирига нисбатан ишончни ўрганади, болалар эса янги сардорларида чин дўст ва мураббийларни кўра бошлайди.
“Сўнгги баҳодир” ва унинг давомий қисмлари
Россияда суратга олинган ушбу саргузашт фильм эртак жанридаги ҳақиқий кашфиёт бўлди. Асосий қаҳрамон — Иван Найденов, Москвада яшовчи оддий йигит бўлиб, ташқи томондан фаровон ҳаёт кечираётгандек кўринса-да, аслида ёлғиз ўсган ва болалар уйида тарбияланган. Бир куни қувғиндан қочаётган пайтда у аквапаркдаги сув қувурларидан бирига шўнғийди ва кутилмаганда сеҳрли Белогоре оламига тушиб қолади. Бу ерда рус эртакларининг қаҳрамонлари яшайди ва сеҳр оддий ҳаётнинг бир қисмига айланган.
“Сўнгги баҳодир” фильми ва унинг сценарий бўйича давом этган қисмлари — “Сўнгги баҳодир: ёвузлик илдизи” ҳамда “Сўнгги баҳодир: зулмат элчиси” — саргузаштли жанговар, комедия ва эртак жанрларини ўзида бирлаштирган. Ялмоғиз кампир, ўлмас Кашей, Сув париси каби машҳур образлар иштирок этган бу картиналар сўнгги йилларда энг кўп томоша қилинган рус фильмлари қаторидан жой олди.
“Чебурашка”
Изоҳ (0)