Toshkent viloyatida onasi tomonidan kaltaklangan 4 yoshli qiz 7-yanvar kuni vafot etdi. Bu haqda “Daryo” so‘roviga ko‘ra bolalar ombusdmani xabar qildi.
23-dekabr kuni Toshkent viloyati Bo‘stonliq tuman tibbiyot birlashmasiga 2020-yilda tug‘ilgan qiz Y.M. tanasidagi turli jarohatlar bilan qabul qilingandi. Holat yuzasidan o‘tkazilgan tergovga qadar tekshiruv natijasida E.Y. (1977-yilda tug‘ilgan ayol) 4 yoshli qizini qattiq kaltaklab, tan jarohati yetkazgani aniqlandi.
Xususan, tibbiyot xulosasiga ko‘ra, bolada bosh miya yopiq jarohati, bosh miya lat yeyishi og‘ir darajasi va bosh sohasidagi boshqa og‘ir jarohatlar qayd etilgan.
Holat yuzasidan Toshkent viloyati Chirchiq shahar IIB tomonidan E.Y.ga nisbatan Jinoyat kodeksining 126-1-moddasi 7-qismi “b” bandi (oilaviy (maishiy) zo‘ravonlik voyaga yetmagan shaxsga nisbatan) bilan jinoyat ishi qo‘zg‘atilgandi.
“Tergov vaqtida jinoyat natijasidagi oqibat o‘zgargani, ya’ni jabrlanuvchining o‘limi jinoyatga huquqiy baho berish jarayoniga ta’sir qiladi — ayblovni og‘irroq jazoni ko‘zda tutuvchi qismga qayta malakalash lozim bo‘ladi”, deydi bolalar ombudsmani.
Bu tergov tomonidan amalga oshiriladi. Ish yuzasidan yakuniy qarorni esa sud beradi.
Bolalarga nisbatan zo‘ravonlik
O‘zbekistonda bolalarga nisbatan zo‘ravonlik holatlari tez-tez qayd etilmoqda. Xususan, Buxoro viloyati, Shofirkon tumanida ona 9 yoshli qizining qo‘li va yuziga qizigan kapkir bosgandi. Surxondaryoda ayol 15 yoshli qizini doimiy tarzda kaltaklab kelgani aniqlangandi
2024-yil 14-noyabrda “Bolalarni zo‘ravonlikning barcha shakllaridan himoya qilish” to‘g‘risida qonun imzolandi. Qonunda zo‘ravonlik turlari aniq belgilab berildi, jabrlanuvchi bolalar va ularning oilalarini qo‘llab-quvvatlash hamda maktablarda zo‘ravonlikning oldini olish choralari belgilandi.
Izoh (0)