Toshkent viloyatida 7 yoshli bola onasi va o‘gay otasi tomonidan kaltaklandi. Bu haqda bolalar ombudsmani xabar berdi.
Unga ko‘ra, bolalar ombudsmaniga Yuqori Chirchiq tumanida yashovchi voyaga yetmagan G.I. (2018-yilda tug‘ilgan o‘g‘il bola)ga oid murojaat kelib tushdi. Murojaatga asosan joriy yilning 30-iyun kuni 7 yoshli bola onasi va o‘gay otasi unga qo‘pol muomala qilishi va kaltaklagani tufayli yarim tunda uyidan qochib chiqib ketib, qo‘shni dala hovli darvozasini taqillatgan va yordam so‘ragan.
Bolalar ombudsmani so‘rovi asosida ushbu hudud “Inson” ijtimoiy xizmati markazi tomonidan holat o‘rganildi. Voyaga yetmagan G.I.ning onasi G.K. (1995-yilda tug‘ilgan ayol) bilan suhbatlashilib, vaziyat yuzasidan zarur choralar ko‘rildi.
G.I.ning onasi farzandini tarbiyalash borasidagi majburiyatini bajarmagani uchun Ma’muriy javobgarlik to‘g‘risidagi kodeksning 47-moddasi 1-qismi bilan ma’muriy javobgarlikka tortildi.
Shuningdek, onaga va o‘gay otaga “Bolalarni zo‘ravonlikning barcha shakllaridan himoya qilish” to‘g‘risidagi qonun doirasida bola davlat himoyasida ekani tushuntirilib, unga nisbatan qilingan har bir nojo‘ya harakat javobgarlikka olib kelishi to‘g‘risida ogohlantirildi.
Mazkur oilaga oid ijtimoiy keys ochilib, bolani himoyalash choralari ko‘rilmoqda.
2025-yil boshlarida Toshkent viloyatida onasi tomonidan kaltaklangan 4 yoshli qiz vafot etgandi. Holat yuzasidan jinoyat ishi qo‘zg‘atilib, ayol qamoqqa olingan. 27-yanvar kuni Toshkent viloyatida qaynona-kelin janjali sabab chaqaloq kuyib qolgandi. Olmaliqda ayol shirinliklarni ruxsatsiz yegan bolasining tana a’zolariga paxta tiqib, yoqqani haqida ham xabar berilgandi.
2024-yil 14-noyabrda “Bolalarni zo‘ravonlikning barcha shakllaridan himoya qilish to‘g‘risida”gi qonun qabul qilingandi. Qonun 2025-yil 15-maydan kuchga kiradi. Unda bolalarni zo‘ravonlikning barcha shakllaridan himoya qilish bo‘yicha umumiy va individual chora-tadbirlar belgilab berilgan.
Izoh (0)