Палеонтологлар Франциянинг жануби-шарқидаги Сент-Виктуар тоғи атрофида дунёдаги энг йирик динозавр тухумлари тўпламини аниқлади. Бу ҳақда Agence France Presse (AFP) хабар бермоқда.
Маълум қилинишича, Экс-ан-Прованс яқинидаги ҳудудга норасмий равишда “Прованс тухумлари” номи берилган. Мутахассисларнинг баҳолашича, бу ерда ҳар квадрат метрга биттадан тухум тўғри келади.
Топилманинг ноёблиги шундаки, бу ерда тухумлар дунёнинг бошқа жойларига қараганда кўпроқ учрайди ва бўр давридаги шароитлар уларнинг аъло даражада сақланишига имкон яратган. Сув босган текисликлар ва лой-гилли тупроқлар тухумларнинг тошга айланишини таъминлаган.
Тухумлар ҳар йили топилса-да, уларнинг аксарияти бўш ва уруғланмаган, ёки аллақачон тухумдан бола очиб чиққан. Эмбрионларни топиш — олимлар учун динозаврларнинг турини аниқ белгилашга ёрдам берадиган “Муқаддас Граал” ҳисобланади, аммо ҳозирча бунга эришиб бўлмади.
“Эмбрионни топмагунимизча, уларни қайси тур қўйганини аниқлай олмаймиз”, таъкидлади Тортоса.
Олимларнинг сўнгги йиллардаги энг яхши топилмалари сон ва катта болдир суяклари каби оёқ-қўл суяклари бўлиб, улар эҳтимол рабдодонлар ёки титанозаврлар сингари ўтхўр динозаврларга тегишли.
Қўриқхона ноёб меросни талончилардан ҳимоя қилиш мақсадида 1994 йилдан бери ташриф буюриш учун ёпиқ. Бироқ минтақа раҳбарлари “палеонтологик туризм”ни ривожлантириш имкониятини кўриб чиқмоқда.
“Франция сайёҳларни жалб қилиш учун ўз динозаврларидан фойдалана олмайдиган ягона мамлакатдир”, дея афсус билан таъкидлади Тортоса.
Унинг сўзларига кўра, бошқа мамлакатларда ҳатто битта динозавр тиши учун ҳам бутун бошли музей барпо этилиши мумкин эди.
Бундан аввал британиялик олимлар томонидан АҚШда динозаврнинг янги — ит катталигидаги тури кашф этилгани хабар қилинганди.
Изоҳ (0)