Мадагаскар қирғоқлари яқинида 1721 йилда тарихдаги энг машҳур қароқчилик босқинларидан бирида қўлга олинган елканли кема қолдиқлари аниқланди. Бу ҳақда Livе Science деб хабар бермоқда.
Маълум қилинишича, Ҳиндистондан қимматбаҳо юклар ташиётган Португалиянинг “Носа Сенора ду Кабо” кемасига Оливье Левассер бошчилигидаги денгиз қароқчилари ҳужум қилган.
Ҳозирда чўккан кема Нуси-Бураха ороли яқинидаги кичик бандаргоҳ тубида ётибди. XVIII аср бошларида, “қароқчиликнинг олтин асри” деб аталган даврда, бу ерда қароқчилар макони жойлашган бўлган.
Кеманинг аниқлангани кўплаб далилларга асосланган. Олимлар унинг тузилишини таҳлил қилди, тарихий ёзувлар билан солиштирди ва ҳалокат жойидан топилган ашёларни ўрганди.
Топилмалар орасида ёғоч ва фил суягидан ясалган буюмлар, жумладан, Биби Марям тасвири, хоч ва Инжил матни битилган тахтача бор. Олимларнинг фикрича, булар Ҳиндистоннинг ғарбий қирғоғидаги Португалия мустамлакаси маркази бўлган Гоада тайёрланиб, Лиссабонга жўнатилган. Шунингдек, арабча ёзувли олтин тангалар ва чинни парчалари ҳам топилди.
Тарихий манбаларга кўра, “Носа Сенора ду Кабо” 1721 йил бошида Гоани тарк этган. У олтин қуймалар ва марварид тўла сандиқларни ташиган. Кема бортида Португалия вице-қироли ва Гоа архиепископи бўлган.
Кема бўронда шикастланган. Экипаж сувда қолиш учун замбаракларни бортдан ташлаб юборишга мажбур бўлган. Шу боис 8 апрелда кемани эгаллаб олган қароқчиларга жиддий қаршилик кўрсата олмаган.
Олимларнинг ҳисоб-китобларига кўра, юкнинг қиймати бугунги кунда 138 миллион доллардан ортиқ бўлиши мумкин. Бундан ташқари, қароқчилар асирга олинган вице-қирол учун тўлов олишган. Архиепископнинг тақдири номаълумлигича қолмоқда.
Изоҳ (0)