Мадагаскарнинг шимоли-шарқий қирғоқлари яқинида кема чўкиб кетди. Оқибатда камида 17 киши ҳалок бўлди, 60 дан ортиқ киши бедарак йўқолди. Бу ҳақда 21 декабрь куни «Korrespondent.net» хабар берди.
«Бортида 130 га яқин йўловчиси бўлган кема 20 декабрь куни эрталаб Антанамбадан чиқиб, Соанерана Ивонго томон йўл олганди. Йўлда двигатель хонасига сув оқиб кира бошлаган, шундан сўнг кема чўкиб кетган», — дейилади хабарда.
Қутқарувчилар қидирув ишлари давомида 17 кишининг жасадини топди. 40 дан ортиқ одам қутқарилган, 60 дан ортиқ киши бедарак йўқолган.
Мадагаскар давлат порт маъмурияти маълумотларига кўра, чўкиб кетган юк кемасида йўловчи ташиш учун лицензия бўлмаган.
24 ноябрь куни Франция қирғоқлари яқинида ичида бир неча ўнлаб муҳожирлар бўлган пуфлама қайиқ чўкиб кетганди. Франциядан Буюк Британияга йўл олган муҳожирлар ушбу қайиқ ёрдамида Ла-Манш бўғозидан ўтишга уринган. Ҳалокатга учраганларнинг айримлари Франция соҳил хизматлари томонидан қутқарилган бўлса-да, улардан 27 нафари ҳалок бўлган.
Аввалроқ қайиқ билан Европага йўл олган 75 дан ортиқ муҳожир Ўрта Ер денгизининг Ливия соҳиллари яқинида чўкиб кетгани ҳақида хабар берилганди.
Изоҳ (0)