Мадагаскар ҳукумати ва саноат расмийларига кўра, АҚШ президенти Дональд Трамп томонидан жорий этилган 47 фоизлик бож тарифлари сабаб мамлакатда 60 мингга яқин иш ўрни ёпилиши мумкин. Бу ҳақда Groupement des Entreprises Franches et Partenaires (GEFP) саноат уюшмаси вакилларига таяниб, Reuters ёзмоқда.
GEFP томонидан эълон қилинган баёнотга кўра, Оқ уй АҚШдан кам миқдорда маҳсулот импорт қиладиган қашшоқ давлатларга нисбатан бож тарифларининг энг юқори даражасини қўллаган. Мадагаскар улардан бири бўлиб, мамлакатда 180 минг киши тўқимачилик фаолияти билан шуғулланади. Мазкур сектор Мадагаскар ялпи ички маҳсулотининг тахминан 20 фоизини ташкил қилади.
GEFP ижрочи директори Риндра Андриамаҳефанинг сўзларига кўра, 47 фоизлик бож ставкаси доимий ва вақтинчалик ишдан бўшатишларга олиб келиши мумкин, бу эса мамлакат иқтисодиётига жиддий зарба бўлади.
“АҚШнинг мазкур қарори тахминан 60 минг иш ўрнига таъсир қилади,” деди у.
Ташкилот президенти Beatриса Чан Чинг Йиу эса инвесторлар АҚШ томонидан атиги 10 фоизлик бож жорий этилган бошқа мамлакатларга юз буришини таъкидлади.
“Пандемия бир муаммо эди. Аммо ҳозир биз бутунлай бошқача таҳдидга дуч келяпмиз. Афсуски, вақтинчалик ёки доимий ишдан бўшатишлар муқаррар бўлиши мумкин” деган GEFP раҳбари.
Мадагаскар ҳукумати эса АҚШ расмийлари билан бож тарифлари бўйича музокаралар бошлангани, шунингдек қитъанинг бошқа давлатлари билан ҳамкорликда умумий позиция ишлаб чиқилишини маълум қилди.
Маълумот учун, Мадагаскар 2024 йили Қўшма Штатларга 733 миллион долларлик маҳсулот экспорт қилган, уларнинг катта қисми AGOA қонуни доирасида божхона имтиёзлари билан етказиб берилганди.
Изоҳ (0)