Бразилия жануби-шарқидаги Фурнаш кўлида сайёҳларни олиб юрган катерлар устига қоя бўлаги қулаб тушди. Оқибатда камида етти киши ҳалок бўлди, яна уч киши бедарак йўқолди. Бу ҳақда маҳаллий ўт ўчириш бошқармасига таяниб, Reuters хабар берди.
8 январь куни сайёҳлар бир нечта туристик қайиқларда кўлдаги шаршарани кўздан кечираётган пайтда қоянинг бир қисми уларнинг устига қулаган. Қайд этилишича, ҳодиса чоғида бортларда камида 34 киши бўлган.
32 киши жабрланган, улардан тўққиз нафарининг жароҳати оғир деб баҳоланмоқда. Аввалига расмийлар воқеа туфайли 20 киши бедарак йўқолгани ҳақида хабар берган бўлса, кейин улардан аксариятининг тақдирига ойдинлик киритилган.
Кўл жойлашган Минас-Жерайис штати қутқарув хизмати матбуот котиби Педро Айихаранинг сўзларига кўра, минтақада икки ҳафта давом этган ёғингарчилик кучли эрозияга учраган қояларнинг қулашига сабаб бўлган. Табиий ландшафтнинг емирилишда давом этиши истисно қилинмаяпти. Воқеа юзасидан терговга мамлакат ҳарбий-денгиз кучлари жалб қилинган.
Аввалроқ Туркияда сайёҳлар билан экскурсия уюштираётган қайиқ чўкиб кетганди. Ҳодиса оқибатида 2 ёшли бола ҳалок бўлган.
Изоҳ (0)