Японияда олти кун аввал ғойиб бўлган кема сувости камералари ёрдамида топилди, деб хабар бермоқда Япония оммавий ахборот воситалари.
NHK телеканали манбаларининг маълум қилишича, 29 апрель куни эрталаб Хоккайдо префектурасидаги Сиретоко ярим ороли яқинида Япония денгиз кучларининг сувости камераси денгиз тубидан йўқолган кемани топди. Қайд этилишича, объект шаршара яқинидаги сувларда тахминан 100 метр чуқурликда ётибди.
Телеканал суҳбатдошларининг айтишича, камерага объектдаги Z, U ва I ҳарфлари кўриниб қолган. Қирғоқ қўриқлаш ходимлари топилма йўқолган «КАZU I» кемаси эканини тасдиқлаган.
Бортида 24 йўловчи ва икки экипаж аъзоси бўлган «КАZU I» кемаси 23 апрель куни Хоккайдо қирғоқлари яқинида ғойиб бўлганди. Ҳозиргача 14 кишининг жасади топилган.
Аввалроқ Атлантика океанидаги Канар ороллари соҳили яқинида ичида муҳожирлар бўлган қайиқ ҳалокатга учраб, 26 киши бедарак йўқолган эди.
Шунингдек, Греция яқинида мигрантлар бўлган қайиқ ағдарилиб кетгани, Мадагаскар яқинида 100 дан ортиқ йўловчиси бор кема чўкиб кетиб, камида 17 киши ҳалок бўлгани, Ўрта Ер денгизида 130 га яқин ноқонуний муҳожир бедарак йўқолгани ҳақида хабарлар берилган.
Изоҳ (0)