Атлантика океанида Канар ороллари соҳили яқинида ичида муҳожирлар бўлган қайиқ ҳалокатга учраши оқибатида камида 1 нафар одам чўкиб кетди ва 26 киши бедарак йўқолди. Бу ҳақда Reuters хабар берди.
Испания соҳил қўриқлаш хизмати Гран-Канария ороли жанубидан 217 километр узоқликда ҳалокатга учраган кемадан 34 нафар одамни қутқарган. Шунингдек, ичида 63 нафар йўловчи, жумладан, 2 нафар бола бўлган яна иккита кема жанубдан 64 километр узоқликда сузаётгани аниқланган. Соҳил қўриқлаш хизмати бортдаги ҳамма қутқариб олинганини маълум қилган.
Испания соҳил қўриқлаш хизматининг самолёти ҳалокатга учраган кемадагиларни қутқаришга етиб келгунига қадар, ён-атрофдаги иккита савдо кемаси ва вертолёт мигрантларга ёрдам қилган. Қутқариб қолинган муҳожирлар Гран-Канариядаги Аргинегин портига кундузги соат 10 да етиб келган. Маълумотларга кўра, кема йўловчиларининг ҳаммаси Саҳройи кабир жанубидаги мамлакатларнинг фуқаролари.
Марокашдан 96 километр ғарбда жойлашган Канар ороллари охирги йилларда муҳожирларнинг Европага келиши учун энг оммалашган денгиз йўлига айланиб қолди. Мониторинг гуруҳи ўтган йилнинг ўзида 4400 га яқин одамнинг Испанияга келишга уриниб, сувга чўкиб ҳалок бўлганини аниқлаган. 2021 йилда жами 22 316 нафар муҳожир кемаларда Испанияга етиб келган.
Аввал Греция яқинида мигрантлар бўлган қайиқ ағдарилиб кетгани, Мадагаскар яқинида 100 дан ортиқ йўловчиси бор кема чўкиб кетиб, камида 17 киши ҳалок бўлгани, Ўрта Ер денгизида 130 га яқин ноқонуний муҳожир бедарак йўқолгани ҳақида хабарлар берилган.
Изоҳ (0)