Мадагаскарда 57 ёшли вазир вертолёт ҳалокатидан омон қолди. У балиқчиларга йўлиққунча соҳилга қараб 10 соат сузган, қирғоққа етгандан сўнг ишга чиқишга тайёрлигини билдирган

Мадагаскар полицияси вазири Серж Желле ўзи ўтирган вертолётнинг океанга қулашидан омон қолди ва қарийб 10 соат давомида соҳилга қараб сузди, уни балиқчилар қутқарди. Бу ҳақда Agence France-Presse’га таяниб, Meduza хабар берди.

57 ёшли Желле ва яна уч кишини олиб кетаётган вертолёт 20 декабрь куни тахминан соат 19:00 да ҳалокатга учраган. Вазир ҳодисадан бир неча соат аввал Мадагаскарнинг шимоли-шарқий соҳили яқинида 120 дан ортиқ йўловчиси бор кема чўкиб кетган жойга қараб учаётганди. Кема ҳаддан ташқари кўп юкка дош беролмаган. Сўнгги маълумотларга кўра, 64 киши ҳалок бўлган, яна 20 киши бедарак йўқолган, 45 киши қутқарилган.

Желленинг айтишича, кучли шамол туфайли вертолёт сув тўлқинига урилган. Вазирда қутқарув нимчаси бўлмаган, у сув юзасида қолиш учун учувчининг ўриндиғидан фойдаланган. Эрталаб соат тўртларда денгизга чиққан балиқчилар уни кўриб қолган.

«Ҳали ажалим етгани йўқ», — деди Желле қутқарувдан кейинги биринчи интервьюсида. У 24 соат ичида ишга қайтмоқчилигини таъкидлади. Желледан ташқари вертолёт механиги ҳам сузиб келишга муваффақ бўлган. Вертолёт бортидаги учувчи ва яна бир полициячи расман бедарак йўқолган, деб ҳисобланмоқда.

Серж Желле август ойида Мадагаскар президенти давлат тўнтаришига уриниш муваффақиятсизликка учрагани ҳақидаги миш-мишлар туфайли аввалги Вазирлар Маҳкамасини тўлиқ таркибда ишдан бўшатганидан сўнг вазир бўлганди. Унгача Желле ўттиз йил давомида полицияда хизмат қилган.