Бангладешдаги МВ Абҳижан-10 паромида содир бўлган ёнғин оқибатида камида 30 киши ҳалок бўлди. Юздан ортиқ йўловчи жароҳат олган. Бу ҳақда БНО News нашрига таяниб, «Korrespondent.net» хабар берди. Таъкидланишича, паромда жами 500 дан ортиқ одам бўлган.
Фожиа 24 декабрь куни соат 03:00 ларда содир бўлган. Паром Жалокати туманидаги Суганда дарёсида ёниб кетган.
Маълум қилинишича, камида 70 киши туман шифохонасига етказилган. Қутқарувчиларнинг тахминича, қурбонлар сони ортиши мумкин. Бедарак йўқолганларнинг аниқ сони маълум эмас. Ёнғин нима сабабдан юзага келгани номаълум.
Эслатиб ўтамиз, 2021 йилнинг августида Бангладеш шарқида 100 нафар йўловчи бўлган қайиқ ва қум ортилган траулер (балиқ овлашга мўлжалланган кема) тўқнашиб кетганди. Ҳодиса оқибатида камида 21 киши ҳалок бўлган.
Аввалроқ Мьянмада содир бўлган кўчки оқибатида 100 га яқин одам бедарак йўқолгани, Мадагаскар яқинида 100 дан ортиқ йўловчиси бор кема чўкиб кетиши натижасида камида 17 киши ҳалок бўлгани, Япониядаги кўп қаватли бинода содир бўлган ёнғин оқибатида 27 киши ҳалок бўлгани тўғрисида хабар берилганди.
Изоҳ (0)