Мадагаскар футбол бўйича Россия терма жамоасига қарши ўртоқлик ўйини ташкил этишга рози бўлди. Бу ҳақда Мадагаскарнинг давлат бошқаруви ва халқаро алоқалар бўйича директори Девид Разананзоа “РИА Новости”га маълум қилган.
Аввалроқ Россия футбол иттифоқи (РФУ) президенти маслаҳатчиси Алексей Сорокин ташкилот 2025 йил учун Жанубий Америка ва Африкада Россия терма жамоасига рақиблар топиш устида иш олиб бораётгани ҳақида маълум қилганди. Ноябрь ойида Валерий Карпин шогирдлари Сурия терма жамоасига қарши майдонга тушади.
Ҳиндистон футбол федерацияси Россия футбол иттифоқи билан 2025 йилда миллий терма жамоалар ўртасида ўртоқлик ўйини ўтказиш бўйича музокаралар олиб боришга тайёр эканини маълум қилганди.
Октябрь ойидаги FIFA танаффусида Россия терма жамоаси Покистон термаси билан ўйнаши керак эди, бироқ рақиб ўртоқлик учрашувидан бош тортди. Натижада Валерий Карпин шогирдлари йиғинни ўйинсиз ўтказди.
Маълумот учун, 2022 йилнинг февраль ойидан бошлаб FIFA ва УЕФА қарори билан Украинадаги вазият туфайли Россиянинг барча терма жамоалари ва клублари халқаро турнирлардан четлаштирилди. Шу тариқа Россия эркаклар терма жамоаси Қатардаги жаҳон чемпионати ва Германияда бўлиб ўтган Европа чемпионатини ўтказиб юборди.
Изоҳ (0)