Солиқ қўмитаси Солиқ мобил иловасида концерт-томоша фаолияти вакиллари учун солиқ декларациясини топшириш бўйича жорий этилган янги хизматнинг дастлабки натижаларини маълум қилди.

30 июнда ишга туширилган хизмат билан хонанда ва ижрочиларга солиқ органларига йиллик умумий даромадлари тўғрисидаги декларацияни соддалаштирилган тартибда тақдим этиш имкони берилди. Уларнинг конституциявий бурчи бўлган — даромад солиғини тўлаш мажбурияти “Ўзбекконцерт” давлат муассасасининг маълумотлар базаси билан солиқ органларининг ахборот тизими интеграция қилиниши натижасида соддалаштирилди.
“Концерт-томоша фаолияти” бўйича лицензияга эга бўлган хонанда ва ижрочилар “Солиқ” мобил иловасида шахсини тасдиқлагач ва Face ID’дан ўтгач, ушбу хизматдан автоматик тарзда фойдаланиши мумкин.
Қўмита маълумотларига кўра, 18 август кунига келиб 1954 нафар лицензия эгаси солиқ декларациясини топширган.
Энг кўп декларация топширган топ-5 та ҳудуд:
- Хоразм вилояти — 294 та;
- Тошкент шаҳри — 291 та;
- Бухоро вилояти — 212 та;
- Самарқанд вилоятида — 207 та;
- Тошкент вилояти — 157 та.
Ўзбекистонда 2027 йил 1 январдан бошлаб санъаткорлардан даромад солиғи мажбурий тартибда ундирилади. Бу ҳақда 1 апрель куни Тошкент шаҳрида ўтказилган матбуот анжуманида Солиқ қўмитаси раиси биринчи ўринбосари Мубин Мирзаев маълум қилганди. Санъаткорлар, қўшиқчилар амалдаги тартиб бўйича декларация тўлдириши ва ўз даромадларини кўрсатиши керак. Шу асосда солиққа тортилиши лозим.
Биз санъаткорларга 2025 ва 2026 йилларда даромадлар декларациясини тўғрилаб, топшириш бўйича имконият берамиз. Яъни камчиликлари бўлса, кўрсатиб, тўғрилашга ёрдамлашяпмиз. 2027 йил 1 январдан бошлаб агар улар ўз даромадларини тўлиқ кўрсатмаса ёки солиқлардан қочса, биз солиқ назорати текширувлари ўтказиб, солиқларни ҳисоблаймиз ва ундирамиз”, деган эди қўмита масъули.
Изоҳ (0)