Эрон президенти Масъуд Пезешкиён Халқаро атом энергетикаси бўйича агентлик (МАГАТЭ) билан ҳамкорликни тўхтатувчи қонунни имзолади. Бу ҳақда Tasnim хабар берди.
Президентнинг сўзларига кўра, қонун 25 июнь куни “Исроил ва АҚШнинг сўнгги ҳужумларига, шунингдек, МАГАТЭнинг бу ҳаракатларни қоралашдан бош тортишига жавобан” қабул қилинган. Ҳужжат ҳукуматга агентлик билан ҳамкорликни бутунлай тўхтатиш мажбуриятини юклайди.
Янги қонун МАГАТЭ инспекторларининг Эрон ҳудудига киришини тақиқлайди ва барча текширув тадбирларини тўхтатади. Ҳужжат 1969 йилги Вена конвенциясининг 60-моддасига мувофиқ иккита шарт бажарилгунга қадар кучга киради: Эрон суверенитети, ҳудудий яхлитлиги, ядровий объектлари ва олимларининг хавфсизлигини таъминлаш, шунингдек, Ядро қуролини тарқатмаслик тўғрисидаги шартноманинг 4-бандига мувофиқ мамлакатнинг тинч ядро энергиясидан фойдаланиш ҳуқуқини ҳурмат қилиш.
Бу шартлар фақат Эрон атом агентлигининг ҳисоботи ва Миллий хавфсизлик кенгашининг тасдиғи билан расман тасдиқланади. Ҳукумат қонуннинг бажарилиши тўғрисида ҳар чоракда Мажлис ва кенгашга ҳисобот бериб туриши шарт.
Исроил 13 июндан бошлаб Эронга тинимсиз ҳужум қилиб, унинг ядровий объектлари, мудофаа тизимлари, юқори мартабали ҳарбий амалдорлари ва ядрочи олимларини нишонга олди. Ҳужумлар оқибатида камида 627 киши, жумладан, кўплаб тинч аҳоли вакиллари ҳалок бўлди, деб хабар бермоқда Эрон соғлиқни сақлаш вазирлиги.
22 июнь куни АҚШ Исроилнинг ҳаракатларига қўшилиб, учта асосий объектга — Фордо, Натанз ва Исфаҳонга авиазарбалар берди. Марказий разведка бошқармаси бошлиғи Жон Ретклифф операция Эрон ядровий дастурига жиддий зарар етказганини маълум қилди. Зарбалардан кўп ўтмай АҚШ президенти Дональд Трамп Эрон ва Исроил ўртасида ўт очишни тўхтатиш режими кучга кирганини эълон қилди, буни иккала томон ҳам тасдиқлади.
Бироқ Эрон расмийлари АҚШ зарбаларидан етказилган зарар минимал бўлганини, Ислом Республикасининг олий раҳбари Али Хоманаий эса Эроннинг Вашингтон ва Тель-Авив устидан “ғалаба қозонганини” эълон қила бошлади. 25 июнда Эрон парламенти МАГАТЭ билан ҳамкорликни тўхтатиш тўғрисида қарор қабул қилган эди.
Изоҳ (0)