АҚШнинг собиқ президенти Жо Байден Европа давлатлари раҳбарлари унга қўнғироқ қилиб, сиёсатга қайтишини сўраётганини маълум қилди. Бу ҳақда The Wall Street Journal хабар бермоқда.
Маълум қилинишича, Жо Байден Сан Диэгода бўлиб ўтган SHRМ ходимларни бошқариш мутахассислари уюшмаси анжуманида сўзлаб, ўз маъмуриятининг асосий ютуқлари ҳозирги ҳокимият томонидан бекор қилинаётганини таъкидлаган.
“Мен жуда кўп меҳнат қилган ва ўзгартира олган нарсаларнинг кўпи жуда тез ўзгармоқда”, деди у.
Байден ўз президентлиги даврида НАТО сезиларли даражада кучайганини, энди эса, АҚШнинг халқаро майдонда ўз мавқейини йўқотиш хавфи борлигини билдирган. Бироқ Дональд Трамп исмини тилга олмаган.
“Мен Европа раҳбарларидан қўнғироқлар қабул қилмоқдаман. Тафсилотларни очиқлай олмайман. Аммо бир нарсани айтишим мумкин, улар мендан ҳозирги вазиятга аралашишимни сўрашмоқда. Мен буни қилмайман, лекин маслаҳат бераман”, деди Байден.
82 ёшли собиқ президентнинг айтишича, у АҚШ сиёсий ҳаётида иштирок этишни давом эттирмоқда. У билан ҳам Демократик, ҳам Республикачилар партиясидан бўлган қонун чиқарувчилар маслаҳатлашмоқда.
“Мен чиндан ҳам қилаётган ишимга бефарқ эмасдим”, деган Жо Байден.
Бундан олдин АҚШ президенти Дональд Трамп Байденни АҚШ тарихидаги энг ёмон президент деб атаган, шунингдек, бошқа собиқ президентлар — Барак Обама ва кичик Жорж Бушни ҳам танқид қилган эди. Трамп фақат ўзигагина юқори баҳо берган.
5 июнь куни Трамп Байденнинг соғлиғи бўйича текширув ўтказишни буюрди. Хусусан, у собиқ президент ёрдамчиларининг унинг соғлиғи ҳақидаги маълумотларни яширган-яширмаганини аниқлашни истади. Шунингдек, Америка раҳбари демократ ёрдамчиларининг ҳужжатларни имзолаш учун автоматик қалам ишлатган-ишлатмаганини текширишни ҳам буюрди.
Бундан аввал Байден ўз қароргоҳи жойлашган Делавер штатидан Вашингтонга поездда ишга бораётгани, офисда сирли лойиҳа устида меҳнат қилаётгани маълум қилинганди.
Изоҳ (0)