ҲАМАС ўт очишни тўхтатишга тайёр эканини билдирди. Бироқ бу Ғазо секторидаги урушга тўлиқ якун ясаши кераклигини айтди. Бу ҳақда The Guardian хабар берди.
АҚШ президенти Дональд Трамп 1 июль куни Исроил 60 кунлик ўт очишни тўхтатиш таклифига рози бўлганини маълум қилган ва ҲАМАСни ҳам бу шартларга қўшилишга чақирганди. ҲАМАС баёноти айнан шу чақириққа жавобан эълон қилинган.
Фаластин ҳаракати вакили Тоҳир ал-Нуну “келишувга эришиш борасида тайёр ва жиддий” эканликларини таъкидлади. Унга кўра, ҲАМАС “урушнинг тўлиқ тугашига олиб келадиган ҳар қандай ташаббусни қабул қилишга тайёр”. Уларнинг делегацияси 2 июнь куни Қоҳирада мисрлик ва қатарлик воситачилар билан учрашиб, таклифни муҳокама қилиши кутилмоқда.
Оташкесим таклифи Трампнинг махсус вакили Стив Уиткофф бошчилигидаги бир неча ойлик яширин саъй-ҳаракатлардан сўнг ишлаб чиқилган. Унда ҲАМАСнинг ҳам манфаатлари ҳисобга олингани айтилмоқда. Жумладан, исроиллик гаровга олинганлар фаластинлик маҳбуслар эвазига озод этилади.
Маълумот учун, Исроилнинг Ғазога ҳужумида жами 56 минг 500 дан ортиқ одам ҳалок бўлган, 134 мингга яқини жароҳатланган.
Изоҳ (0)