Германия узоқ танаффусдан сўнг хорижликларга, жумладан, рус ва беларус фуқароларига гуманитар визалар беришни қайта йўлга қўяди. Бу ҳақда мамлакат расмийларига таяниб, Deutsche Welle хабар берди.
Германия Ташқи ишлар вазирлиги ва Ички ишлар вазирлиги чекловлар олиб ташланганини тасдиқлади. Ҳар иккала вазирлик мамлакат “Яшаш тўғрисидаги қонун”га мувофиқ, ўз сиёсий манфаатларига хизмат қиладиган ҳолларда хорижликларни қабул қилиши мумкинлигини таъкидлади. Ушбу механизм барча чет эллик фуқароларга тааллуқли бўлиб, фақат беларус ёки россияликлар учун алоҳида ишлаб чиқилган эмас.
Расмийларнинг тушунтиришича, бундай имкониятдан сўз эркинлиги, демократия ва инсон ҳуқуқларини ҳимоя қилгани учун хавф остида қолган шахслар ёки Германияга кириши сиёсий манфаатларга хизмат қиладиган хорижликлар фойдалана олади. Бироқ мулозимлар аввалги ҳукумат даврида Россия, Беларусь ва Эрон фуқаролари учун қўлланилган тезлаштирилган қабул тартиби энди ишламаслигини алоҳида таъкидлади.
Европарламент депутати Сергей Лагодинский ҳам мораторий бекор қилинганини тасдиқлади. У ҳукумат вакиллари қарорни очиқ эълон қилганини айтиб, Германия Ташқи ишлар вазирлигига миннатдорлик билдирди.
Визалар нега тўхтатилганди?
Германия Ички ишлар вазирлиги маълумотига кўра, 2022 йил майидан бери 2 490 нафар Россия ҳамда 2021 йил мартидан бери 410 нафар Беларусь фуқароси гуманитар виза учун ариза топширган. Бироқ янги ҳукуматнинг чет элликларни қабул қилиш дастурларини қисқартириш қарори гуманитар асосдаги аризаларга ҳам таъсир қилган. Шу сабабли янги аризаларни қабул қилиш вақтинча тўхтатилган эди.
Вазирликнинг таъкидлашича, янги қоидалар гуманитар виза асосида аллақачон Германияда истиқомат қилаётганларга таъсир қилмайди. Улар яшаш рухсатномаларини амалдаги тартиб асосида олишда давом этади.
Изоҳ (0)