АҚШнинг Флорида штатида яшовчи фуқаро ўзига нисбатан чиқарилган адолатсиз ҳукм туфайли 34 йил қамоқда ўтирганлик учун ҳокимиятдан 1,7 миллион доллар миқдорида товон пули олди. Бу ҳақда 7News хабар бермоқда.
1988 йил июнь ойида Сидней Холмс супермаркет яқинида қуролли ўғриликда айбланган. Эркак дўконда ва унинг атрофида ҳеч қачон бўлмаганини айтганига қарамай, олти киши унинг алибисини тасдиқлаган бўлса-да, у шубҳа остига олинган. Эркакнинг фикрича, барча муаммо унинг автомобилида бўлган. Чунки у ўғрилик содир бўлган жойдаги машинага ўхшарди. Холмс воқеа содир бўлган куни болалари ва отаси билан бирга бўлганини таъкидлаган.
Айбсизлигига қарамай, Флорида штати фуқароси суднинг ҳукми билан 400 йилга озодликдан маҳрум этилган. 2020 йилда Холмс айблов ҳукмларини текшириш бўлимига мурожаат қилган. Текширув натижаларига кўра, прокуратура унинг ушбу жиноятда айбдор эмаслигини тасдиқлади. Эркак ҳеч кимдан хафа эмаслигини ва давлат ёрдами билан нормал ҳаётга қайтишга умид қилаётганини айтди.
2023 йилда 59 ёшли Сидней Холмснинг иши қайта кўриб чиқилиб, тўлиқ оқлангандан сўнг озодликка чиқарилди.
“Жаноб Холмсни ўғрилик билан боғлайдиган ҳеч қандай далил мавжуд эмас. У гумонланувчилар рўйхатига хато туфайли киритилган”, деди судда эркакнинг адвокати.
Изоҳ (0)