Миллиардер Кеннет С. Гриффин АҚШ Конституциясига 13-тузатишнинг Авраам Линкольн томонидан имзоланган қўлёзма нусхасини Sotheby’s кимошди савдосида сотиб олди.
Маълум қилинишича, қулликни бекор қилувчи ушбу ҳужжат 12 миллион долларга сотилган, комиссия билан бирга битимнинг умумий суммаси 13,7 миллион долларни ташкил этган. Бу шу турдаги ҳужжатлар учун рекорд нарх бўлди.
Қўлёзма Sotheby’s савдосининг Fine Books And Manuscripts, Including Americana деб номланган биринчи қисмида тақдим этилиб, асосий лотлардан бирига айланди. Ҳозирги кунда коллексионерлар қўлида бундай нусхалардан атиги тўрттаси мавжуд.
Бундан ташқари, Кеннет С. Гриффин 1864 йилда Линкольн имзолаган қулларни озод қилиш тўғрисидаги Прокламацияни ҳам сотиб олди. Ҳужжат унга 4,4 миллион долларга тушди, дастлабки баҳолаш 3 миллион доллардан 5 миллион долларгача бўлган эди.
Миллиардер ўз баёнотида бу ҳужжатларни “олдинга қўйилган энг муҳим қадам бўлгани” ва барча одамларнинг тенглиги ғоясини тасдиқлангани учун сотиб олганини таъкидлади.
Citadel хедж-фонди асосчиси Кеннет С. Гриффин санъат соҳасидаги энг йирик коллексионер ва ҳомийлардан бири сифатида танилган. У мунтазам равишда АРТnews Тоp 200 Cоllеctors рўйхатига киритилади ва Жаспер Жонс, Виллем де Кунинг, Жексон Поллок, Пол Сезанн асарларига эгалик қилади. Ҳомий, шунингдек, Нью Йоркдаги МоМАдан тортиб Чикагодаги Замонавий санъат музейи ва Флоридадаги Нортон музейигача бўлган етакчи музейларга катта миқдорда маблағ ажратади.
Бундан аввал малика Диананинг кўйлаги аукционда ярим миллион долларга сотилгани хабар қилинганди. Шунингдек, Франция императори Наполеон I Бонапартнинг қиличи Парижда 4,7 миллион еврога сотилганди.
Изоҳ (0)