Тахминан 40 фоиз америкаликлар тадбиркор ва миллиардер Илон Маск ташкил этишни таклиф қилган “Америка” партиясини қўллаб-қувватлаши ёки унга овоз бериши мумкин. Бу ҳақда Quantus Insights компаниясининг сўрови натижалари якунлари бўйича ҳисоботда маълум қилинган.
“Илон Маск томонидан илгари сурилган “Америка” партияси ғояси респондентларнинг 40 фоизида, айниқса, ёш сайловчилар ва республикачи эркакларда қизиқиш уйғотди”, дейилади баёнотда.
Сайловчиларнинг 38 фоизи бунга қарши чиқмоқда, яна 22 фоизи эса аниқ жавоб бермаган. Таъкидланишича, кекса авлод вакиллари ва Демократик партия тарафдорлари бундай ғояга энг кўп шубҳа билан қарашмоқда.
“Гап мавжуд тизим мамлакатни аслида қандай бўлса ёки бўлишни истаса, шундай акс эттира олмаслиги ҳақидаги кучайиб бораётган туйғу ҳақида кетмоқда”, дейишади тадқиқот муаллифлари.
Сўровнома 30 июндан 2 июлгача бўлган даврда 1 минг нафар АҚШ фуқароси ўртасида ўтказилди. Тадқиқотнинг статистик хатолиги 3 фоизни ташкил этади.
“Руҳлантиради”, деб изоҳ берди Маск Х ижтимоий тармоғидаги саҳифасида.
Июнь ойи охирида Маск АҚШда янги сиёсий партия тузиш масаласини яна кўтарди. “Америка” номли партия тузиш ғояси Илонда АҚШ президенти Дональд Трамп илгари сураётган федерал харажатларни қисқартирувчи қонун лойиҳасига норозилик асосида пайдо бўлган.
Изоҳ (0)