Жанубий Корея президенти Ли Же Мёнг Пхеньян билан мулоқотни қайта бошлаш тарафдори, бироқ ҳозирда бунинг имконияти чекланганини тан олмоқда. Бу ҳақда Yonhap хабар бермоқда.
“Биз Шимолий Корея билан муносабатларни АҚШ билан аниқ мувофиқлаштирган ҳолда яхшилашимиз лозим”, деди Ли Же Мёнг.
Унинг фикрича, “мулоқотни бутунлай тўхтатиш нодонликдир”.
Шунингдек, Корея Республикаси президенти Шимол билан мулоқотни қайта йўлга қўйишда муаммолар мавжудлигини эътироф этган. Бироқ у Сеулнинг яқинда КХДР билан чегарада тарғибот эшиттиришларини тўхтатгани муносабатларни тиклашга ёрдам бериши мумкинлигига умид билдирган.
“Биз Шимолий Кореяга радиокарнайлар орқали эшиттиришни тўхтатишга қарор қилганимизда, уларнинг қанчалик тез ва қандай муносабат билдиришидан хавотирда эдим. Аммо Шимолий Кореянинг жавоби жуда тез бўлди ва кутилганидан ҳам ошиб тушди”, деди президент.
“Биз Кореялараро мулоқотни қайта тиклаймиз ҳамда мулоқот ва ҳамкорлик орқали Корея ярим оролида тинчлик ва ҳамжиҳатликка йўл очамиз”, дея қўшимча қилди у.
Пхеньян 12 июнь куни икки давлат чегараси яқинида жанубга қаратилган радиокарнайлар орқали тарғибот узатишни тўхтатди. Бундан олдин Сеул икки томонлама муносабатларни яхшилаш учун худди шундай қадам ташлаган эди.
3 июнь куни Жанубий Кореяда муддатидан олдин президент сайлови ўтказилди. Унда Бирлашган демократик партиядан номзод Ли Же Мёнг ғалаба қозонди.
Июнь ойи бошида Жанубий Кореянинг янги президенти Ли Же Мёнг алоқа каналларини очиш ва Шимол билан Корея яриморолида мустаҳкам тинчлик ўрнатиш учун мулоқот ҳамда ҳамкорликни давом эттириш ниятида эканини маълум қилди. Шу билан бирга, у ўз ҳукумати Шимолий Кореянинг эҳтимолий таҳдидига қарши Жанубий Корея, АҚШ ва Япониянинг мустаҳкам ҳарбий иттифоқига асосланган “кучли тийиб туриш” ёрдамида курашишини таъкидлаганди.
Изоҳ (0)