Шимолий Корея тарихда биринчи марта ўзининг пляж курортини очади. Мамлакат раҳбари Ким Чен Ин туризмни ривожлантираётгани маълум қилинди. Бу ҳақда BBC хабар берди.
“Wонсан Калма” номли курорт Шимолий Кореянинг шарқий соҳилида қуриб битказилган. У 1 июль куни маҳаллий сайёҳлар учун очилиши режалаштирилган. Хорижлик туристларга қачон рухсат берилиши эса ҳали номаълум.
Ким Чен Иннинг ёшлик даврлари курорт жойлашган Вонсан ҳудудида ўтган. У ерда мамлакатнинг кўплаб элиталари шахсий виллаларга эга. Вонсан бир вақтлар ракета полигони жойлашган шаҳар эди. Мамлакат раҳбари ҳозирда ҳудудни ўзгартиришга ҳаракат қилмоқда.
Дам олиш маскани 20 000 киши ташриф буюришига мўлжалланган. Курорт пляжнинг 4 километр ҳудудини эгаллаб, ўз ичига меҳмонхона, ресторан, савдо марказлари ва аквапаркларни олади. У дастлаб 2019 йил октябрь ойида очилиши керак эди, аммо Covid пандемиясида қурилиш ишлари кечиктирилган.
Ўнлаб йиллар давомида ядровий қурол дастури учун қаттиқ санкцияларга учраган Шимолий Корея дунёдаги энг қашшоқ давлатлар қаторига киради. Пхеньян ўз ресурсларининг катта қисмини 1948 йилдан бери мамлакатни бошқараётган Ким оиласи, армия ҳамда диққатга сазовор жойларга йўналтирмоқда.
Туризм Пхеньян учун иқтисодий фойда олишнинг осон йўли ҳисобланади. Хорижий сайёҳлар мамлакатга киритилаётган бўлса-да, туристик гуруҳлар асосан мамлакатнинг “дўстлари” бўлган Хитой ва Россиядан келади.
“Мен бу халқаро туризмнинг кенгроқ очилишига ишора эканига умид қилгандим. Аммо афсуски, ҳозирча бундай эмасга ўхшайди”, дейди Young Pioneer Tours асосчиларидан бири Роуэн Беард.
Мамлакат хорижий туризми Covid пандемияси пайтида инқирозга учраган. Шимолий Корея 2020 йил бошида ўз чегараларини ёпган. Чекловлар 2023 йил ўрталаридан камайтирилиб, бир йилдан сўнг россиялик меҳмонлар мамлакатга киритила бошланган.
Пхеньян февраль ойида Буюк Британия, Франция, Германия ва Австралиядан сайёҳларни қабул қилган. Улар Хитой чегараси орқали мамлакатга кирганди. Бир неча ҳафтадан сўнг мамлакат туризмни тўсатдан тўхтатган ва бунинг сабабини очиқламаган.
Изоҳ (0)