Ўзбекистонда май ойида энг кўп одамни иш билан таъминлаган корхоналар топ ўнталиги эълон қилинди

Ўзбекистонда май ойида аҳолини даромадли меҳнат билан банд қилган топ-10 иш берувчилар маълум қилинди.

Камбағалликни қисқартириш ва бандлик вазирлиги томонидан тақдим этилган маълумотга кўра, 2025 йилнинг май ойида аҳолини даромадли меҳнат билан банд қилган топ-10 иш берувчилар қуйидагича:

• “Real Kapital Kamfort” МЧЖ (Қашқадарё вилояти) — 780 нафар
• “Discover Invest” МЧЖ (Тошкент шаҳри) — 488 нафар
• “Anglesey Food” МЧЖ ХК (Тошкент шаҳри) — 455 нафар
• “Навоий кон-металлургия комбинати” АЖ (Навоий вилояти) — 399 нафар
• “Talimarjan Shared Facilitiyes” МЧЖ (Қашқадарё вилояти) — 398 нафар
• “Uzum Market” МЧЖ ХК (Тошкент шаҳри) — 390 нафар
• ХК “VangʻOzi Trans Servis” (Навоий вилояти) — 372 нафар
• “Жафарбек Қурувчи” МЧЖ (Самарқанд вилояти) — 323 нафар
• “Talimarjan Operations and Maintenance” МЧЖ ХК (Қашқадарё вилояти) — 295 нафар
• “Artel Electronics” МЧЖ ХК (Тошкент шаҳри) — 267 нафар.

2025 йилда 5 млн 200 минг нафар кишини даромадли меҳнат билан таъминлаш, 1 млн 400 минг кишини эса доимий ишга жойлаштириш белгиланган. 

Ниманинг ҳисобига бундай кўрсаткичларга эришмоқчимиз?

Сайиджон Ражабов, Ўзбекистон Республикаси Камбағалликни қисқартириш ва бандлик вазирлиги бош мутахассиси:

Бунинг ичида доимий иш ўрни асосида мавсумий ишлар бор. Шунингдек, биринчи йўналиш — инвестиция лойиҳаларини ишга тушириш орқали 290 минг фуқарони доимий иш ўринларига банд қилиш белгиланяпти. Иккинчи йўналиш — маҳаллаларда тижорий банк ходими лавозимини жорий этиш. 3,6 фоиз аҳолини ишга жойлаштириш, тадбиркорликка жалб қилиш масалалар Марказий банкка юклатиляпти.

Учинчи йўналиш — қишлоқ хўжалиги йўналиши бўлиб, 1 йилда 1 млн 200 минг аҳолини ҳам доимий, ҳам мавсумий ишларга жалб қилиш режа қилинган. Тўртинчи йўналиш бу — қурилиш. У орқали 168 минг одамни ҳам доимий, ҳам вақтинчалик ишларда бандлигини таъминлаш белгиланган. Мана шу 5,2 миллион аҳоли бандлигини таъминлаш бўйича амалга ошириладиган ишлар таҳлили ва уни мониторинг қилиб бориш Камбағалликни қисқартириш ва бандлик вазирлигига юклатилган. Бу рақамларни онлайн мониторинг қилиб бориш мақсадида янги www.mehnat.uz платформасини ишга туширганмиз.

Бу платформа Солиқ қўмитасининг электрон базасига интеграция қилинган, янги ишга қабул қилинган фуқароларнинг солиқ тўлашдаги шаффофлигини таъминлаш мақсадида, шунингдек, тегишли вазирлик идоралар ҳам ўша электрон базаларга интеграция қилинди.

2025 йилда дастур ижроси доирасида 5,2 миллион аҳолини иш билан банд қилиш ҳамда даромадли меҳнат билан таъминлаш мақсадида айрим ташкилотлар масъул этиб белгиланди.

Марказий банк, Камбағалликни қисқартириш ва бандлик вазирлиги, Иқтисодиёт ва молия вазирлиги:

• тадбиркорларни молиявий қўллаб-қувватлаш, уларнинг муаммоларини ҳал этиш ҳамда фаолиятини кенгайтириш ҳисобига 1 млн 470 минг нафар;
• ишсизларни мавжуд бўш иш ўринларига жойлаштириш орқали 430 минг нафар;
• ҳар бир маҳаллада ўртача 40 тадан жами 377,6 мингта микролойиҳаларни амалга ошириш ҳисобига 755 минг нафар, шунингдек, “Маҳалла лойиҳаси” доирасида соддалаштирилган тартибда лойиҳаларни молиялаштириш учун янги кредит маҳсулотларини жорий қилиш орқали 250 минг нафар;
• ҳудудларда “драйвер” лойиҳаларни ишга тушириш ҳисобига 122 минг нафар ҳамда микросаноат марказларини барпо этиш лойиҳалари ҳисобига 21 минг нафар;
• аҳолига ер майдонларини ижарага бериш, шу жумладан, “компания — кооператив — деҳқон хўжалиги” тамойили асосида кооперативлар ташкил этиш ҳисобига 300 минг нафар;

Қишлоқ хўжалиги вазирлиги, Ўзбекистон фермер, деҳқон хўжаликлари ва томорқа ер эгалари кенгаши:

• аҳоли томорқасидан самарали фойдаланишни ташкил этиш ҳамда фермер ва деҳқон хўжаликларини қўллаб-қувватлаш орқали 1 млн 169 минг нафар;

Инвестициялар, саноат ва савдо вазирлиги, Савдо-саноат палатаси:

• инвестиция лойиҳаларини амалга ошириш ҳисобига 290 минг нафар;

Қурилиш ва уй-жой коммунал хўжалиги вазирлиги:

• қурилиш соҳасидаги лойиҳаларни амалга ошириш ҳисобига 169 минг нафар;

Камбағалликни қисқартириш ва бандлик вазирлиги, Рақамли технологиялар вазирлиги, Олий таълим, фан ва инновациялар вазирлиги:

• аҳолини касб-ҳунар ва тадбиркорликка ўқитиб, ишга жойлаштириш ҳисобига 266 минг нафар аҳолини даромадли меҳнат билан таъминлашга масъул этиб белгиланди.

Дастурнинг амалга оширилишини молиявий қўллаб-қувватлаш мақсадида 126 триллион сўм йўналтирилади.

Жумладан:

• тижорат банкларининг кичик ва ўрта бизнес субъектларини молиявий қўллаб-қувватлаш учун 120 триллион сўм кредит маблағлари, шундан 2,4 миллиард АҚШ доллари миқдоридаги хорижий кредит линиялари;
• оғир тоифадаги 1000 та маҳаллалар инфратузилмасини яхшилаш учун 3,2 триллион сўм бюджет маблағлари;
• туман ва шаҳарларнинг ихтисослашувидан келиб чиқиб, саноат, қишлоқ хўжалиги ва хизмат кўрсатиш соҳаларида тадбиркорликнинг ривожланишига туртки берувчи драйвер лойиҳалар учун зарур инфратузилмани яратишга 1 триллион сўм бюджет маблағлари;
• мақсадли жамғармалар орқали камбағалликни қисқартириш ва аҳоли бандлигини таъминлашни рағбатлантириш учун 952 миллиард сўм.