Англиянинг “Арсенал” клуби Германиянинг “Лейпциг” жамоаси ҳужумчиси Бенямин Шешко билан шартнома имзолашга яқин турибди. Бу ҳақда The Sun нашри хабар берди.
Манбага кўра, Словения терма жамоаси вакилига клуб бош мураббийи Микель Артета шахсан қизиқиш билдирган. “Арсенал” футболчи учун 81 миллион евродан ортиқ маблағ тўлашга тайёр.
Ҳозирда трансфернинг амалга ошишига ягона тўсиқ – бу Шешконинг шахсий шартнома борасидаги талаблари. Нашрга кўра, ҳужумчи клуб томонидан режалаштирилган маош бюджетидан юқорироқ иш ҳақи сўрамоқда. Бу эса клубнинг режаларига тўғри келмайди. Ҳозирда клубнинг олдида иккита йўл бор — футболчининг талабларини қондириш ёки Шешко трансферидан воз бор.
Маълумот учун, 21 ёшли Шешко ўтган мавсумда “Лейпциг” сафида 45 ўйинда майдонга тушиб, ўз ҳисобига 21 та гол ёздириб қўйган. Унинг клуб билан шартномаси 2029 йилнинг ёзига қадар амал қилади. Transfermarkt портали ҳужумчининг қийматини 70 миллион еврога баҳоламоқда.
Изоҳ (0)