Испаниянинг “Барселона” клуби “Атлетик” (Бильбао) жамоасида тўп сураётган футболчи Нико Уильямс билан шартнома шартларини келишиб олган бўлишига қарамай, трансферни амалга ошира олмаяпти. Бу ҳақда Mundo Deportivo нашри хабар берди.
Манбага кўра, каталонияликлар фақат катта маош олувчи футболчилардан бири жамоани тарк этса, Уильямсни рўйхатдан ўтказа олади. Клуб ҳозирда молиявий фейр-плей чекловларига дуч келмоқда ва шу сабабли янги футболчиларни рўйхатдан ўтказишда муаммолар кузатилмоқда.
Хабарда айтилишича, асосий номзод — дарвозабон Марк-Андре тер Штеген ҳисобланади. Агар у клубни тарк этса, “Барселона” молиявий жиҳатдан бир оз эркинликка эга бўлиши мумкин. Шу билан бирга, захира вариант сифатида ҳимоячи Роналд Араухо номзоди ҳам кўрилмоқда.
Эслатиб ўтамиз, 22 ёшли Нико Уильямс жорий мавсумда “Атлетик” сафида барча мусобақалар доирасида 45 та ўйинда майдонга тушиб, 11 та гол ва 7 та голли узатма муаллифи бўлган.
Изоҳ (0)