“Барселона” клуби 17 ёшли Ламин Ямал билан янги шартнома бўйича келишиб олди. Бу ҳақда таниқли инсайдер Николо Скира хабар бермоқда.
Манбага кўра, испаниялик футболчи каталонияликлар билан 2030 йил ёзигача мўлжалланган битим имзолайди. Шартнома молиявий жиҳатдан ҳам анча яхшиланган: Скира маълумотига кўра, Ямалнинг йиллик маоши 9 миллион еврони ташкил этади ва бу кўрсаткич ҳар йили ошиб боради ва унинг йиллик иш ҳақи 18 миллион еврогача етиши кутилмоқда. У “Барса”да де Йонг ва Левандовскидан кейин энг кўп маош оладиган футболчилар учлигига киради.
Аввалроқ каталонияликлар футболчи 18 ёшга тўлган куни янги шартнома имзолаши ҳақида хабарлар тарқалган эди. Шунингдек, ўша куни Ламинга 10-рақам ҳам берилиши айтилганди.
Ямал 2024/25 йилги мавсумда ажойиб статистикани қайд этди: у 54 та ўйинда майдонга тушиб, ўз ҳисобига 18 та гол ва 21 та голли узатма ёздириб қўйган. Унинг ҳозирги шартномаси 2026 йилнинг ёзига қадар амал қилади. Transfermarkt портали Ямалнинг қийматини 180 миллон еврога баҳолаган.
Изоҳ (0)