Саудия Арабистонининг “Ал-Ҳилол” клуби Италия А Сериясининг икки футболчиси — “Наполи” ҳужумчиси Виктор Осимҳен ва “Милан” ҳимоячиси Тео Эрнандесни ўз сафига қўшиб олиш учун таклифларини яхшилаган. Бу ҳақда таниқли инсайдер Николо Скира ўзининг Х (аввалги Twitter) ижтимоий тармоғидаги саҳифасида маълум қилди.
Манбага кўра, “Ал-Ҳилол” раҳбарияти ҳар икки футболчини имкон қадар тезроқ жамоага олиб келишни режалаштирмоқда. Ҳозирда томонлар ўртасида музокаралар давом этмоқда.
Аввалроқ ОАВда “Ал-Ҳилол” Осимҳенга йилига 50 миллион евро миқдорида маош таклиф қилгани ҳақида хабарлар тарқалган эди. Бунгача 26 ёшли нигериялик футболчи йилига 30 миллион евро таклиф қилинган дастлабки вариантни рад этгани айтилган. Шунингдек, клуб унинг “Наполи” билан амалдаги шартномасини бекор қилиш учун 75 миллион евро миқдорида товон пули тўлашга тайёрлигини билдирган.
Тео Эрнандес борасида “Милан” ва “Ал-Ҳилол” 30 миллион евро эвазига келишувга эришгани, қўшимча равишда 5 миллион евро бонус тарзида тўланиши мумкинлиги ҳақида маълумотлар тарқалган. Бироқ кейинчалик бу келишув расман тасдиқланмагани ва футболчининг трансферга ҳозирча розилик бермагани маълум қилинди.
Изоҳ (0)