Мадриднинг “Реал” клуби бразилиялик футболчи Винисиус Жуниор билан янги шартнома имзолаш арафасида турибди. Бу ҳақда инсайдер Николо Скира ўзининг ижтимоий тармоқлардаги саҳифасида хабар берди.
Манбага кўра, 24 ёшли футболчининг янги шартномаси 2030 йилга қадар мўлжалланган бўлади. Аввалроқ Винисиуснинг йиллик 20 миллион евро маош олиши ва бу кўрсаткич ҳар мавсумда ошиб бориши мумкинлиги ҳақида хабарлар тарқалган эди.
Винисиус 2018 йилнинг июль ойида “Фламенго” клубидан 45 миллион евро эвазига Мадрид жамоасига келиб қўшилган. Унинг амалдаги шартномаси 2027 йил 30 июнгача амал қилади.
Шунингдек, яқинда Винисиус ижтимоий тармоқларда “Реал” либосидаги бир нечта суратларини ўчириб ташлагани, уни клубдан кетмоқчи деган тахминларга сабаб бўлди. Бироқ бу ҳолат футболчининг мухлислар томонидан танқидга учрагани билан боғлиқ экани айтилмоқда.
Изоҳ (0)