NASA Маrs Chopper деб номланган янги вертолётни ишлаб чиқмоқда. У енгил автомобиль ҳажмида бўлиб, оғирлиги 40 килограммни ташкил этади.
Қурилма 5 килогача илмий асбоб-ускуналарни олиб юриши ва 3 километргача масофани босиб ўтиши мумкин. Маrs Chopper’нинг вазифаси сайёранинг етиб бориш қийин бўлган — марсоходлар учун мавжуд бўлмаган ҳудудларини ўрганишдан иборат бўлади.
Маrs Chopper учун таклиф этилган миссиялардан бири — Nighthawk лойиҳаси бўлиб, у Noctis Labyrinthus ҳудудини ўрганишни назарда тутади. Бу ҳудуд мураккаб канёнлар ва лава майдонларидан иборат. Олимлар фикрича, бу ерда муз ҳолатидаги сув ва эҳтимолий биологик излар бўлиши мумкин. Бу эса уни ҳаёт белгиларини излаш учун истиқболли қилади.
Nighthawk миссиясини бажариш учун Маrs Chopper’ни умумий оғирлиги 3 килограмм бўлган учта илмий асбоб, жумладан, ҳар томонга йўналтирилган камера, спектрометр ва тупроқнинг юқори қатламларидаги сув миқдорини баҳолаш учун нейтрон детектори билан жиҳозлаш режалаштирилган. Ушбу ускуналар эҳтимолий сув захираларини аниқлаш ҳамда ҳудуднинг геологик эволюциясини ўрганишда ёрдам беради.
Март ойида NASA Марсда қадимги ҳаётнинг эҳтимолий изларини топган эди. Жумладан, сайёра юзасидаги қоялардан “кўкнори уруғлари” деб номланган қора доғлар ва “қоплон доғлари” қайд этилган.
Ердаги бундай тузилмалар одатда қадимги микроб фаолияти билан боғланади. Бироқ улар ноорганик жараёнлар, масалан, вулқон отилиши натижасида ҳам ҳосил бўлиши мумкин. NASA мутахассислари фикрича, аниқланган чўкиндилар паст ҳароратли реакциялар шароитида шаклланган бўлиши мумкин, бу эса уларнинг биологик келиб чиқиши ҳақидаги фаразни қўллаб-қувватлаши мумкин.
Изоҳ (0)