БААда фойдаланувчининг хоҳиш-истаклари асосида жуфтлик топишга ёрдам берадиган сунъий интеллектга эга илова тақдим этилди. Бу ҳақда Khaleej Times хабар берди.
Илова фойдаланувчилар маълумотларини таҳлил қилади. Ундан Бирлашган Араб Амирликлари резидентлари ва фуқаролари фойдалана олади. Платформа фойдаланувчи томонидан киритилган маълумотлар асосида мос жуфтликларни танлашда сунъий интеллект технологияларидан фойдаланади. Бунда Амирликларнинг исломий урф-одатлари ва ижтимоий махфийликка қатъий риоя қилинади.
Фойдаланувчи иловага қандай жуфтни афзал кўриши ҳақида маълумотларни киритади. Тизим шунга асосан иккинчи жуфтни топади ва иккала томондан ҳам тасдиқлашни сўрайди. Ўзаро келишувга кўра, иккала фойдаланувчи ҳам ўз саҳифасига кириб, учрашиш истагини тасдиқлаши лозим.
Учрашув келиннинг оиласи уйида урф-одатларга риоя қилган ҳолда ўтказилади. Дастурчилар махфийликни таъминлашга ваъда бермоқда. Шахсий маълумотлар томонлар имзолаган юридик келишув асосида узатилади.
Обуна нархи 1 099 дирҳамни (салкам 300 доллар) ташкил этади, унга турмуш ўртоқ танлаш учун тўртта уриниш киради. Профилнинг амал қилиш муддати чекланмаган. Иловани яратиш ғояси мамлакат одатларини эътиборга олмайдиган танишув иловалари сонининг кўпайиши фонида пайдо бўлган.
Изоҳ (0)