DC Studios раҳбарларидан бири Жеймс Ганн Entertainment Weekly нашрига берган интервьюсида “Мўжизакор аёл” ҳақидаги янги фильм учун сценарий ёзилаётганини тасдиқлади. Маълумотларга кўра, фильм учун кастинг ҳали ўтказилмаган.
DC кинематография оламининг қайта ишга туширилаётган лойиҳаларидан биринчи фильми “Супермен” АҚШда 11 июлдан бошлаб намойиш этилади. 2026 йил 26 июнь куни эса Суперменнинг амакиваччаси ҳақидаги фильм — “Supergirl” премераси режалаштирилган. Унда “Аждарлар уйи” сериали орқали танилган Милли Олкок бош ролни ижро этади.
Янги Супермен ва Лоис Лейн ролларини ким ижро этиши 2023 йил июнь ойида маълум бўлган, бу ролларни Девид Коренсвет ва Рейчел Броснахен гавдалантиради. Коренсвет илгари “Голливуд”, “Сиёсатчи” сериаллари ҳамда “Pearl” фильмида суратга тушган.
Броснахен “Доллар учун ўлим”, “Жосуслар ўйини”, “Тўфон бошланганда” каби фильмларда иштирок этган. У “Ажойиб Мейзел хоним” сериалидаги роли учун “Эмми” ва “Олтин глобус” мукофотларини қўлга киритган.
Коренсвет Супермен ролини ўйнаган тўртинчи актёр бўлади. Биринчи бўлиб бу ролни 1978 йилги “Супермен” фильмида Кристофер Рив ижро этган ва у кейинги учта фильмда ҳам суратга тушган. 2006 йилда эса Брайан Сингернинг “Суперменнинг қайтиши” фильмида Бредон Раут иштирок этган, аммо фильм тижорий муваффақият қозона олмаган.
10 йил аввал британиялик Генри Кавилл “Пўлат одам” фильмида Супермен ролини ижро этди, шунингдек, “Бетмен ва Супермен” (2016) ҳамда “Адолат лигаси” (2017) фильмларида ҳам ишлаган. Кавилл ролни давом эттириш ниятида эди, бироқ Ганн ва DC’нинг яна бир раҳбари Питер Сафран бу сафар ёшроқ актёрни танлашни маъқул кўрди.
Аввалги DC фильмларида Мўжизакор аёл образини Гал Гадот гавдалантирган эди. У биринчи бор 2016 йилги “Бетмен Суперменга қарши: адолат тонги” фильмида шу роли билан экранларга чиққан. Режиссёр Петти Женкинс томонидан 2017 ва 2020 йилларда мўжизакор аёл образига бағишланган икки мустақил фильм намойиш этилди.
Аммо Ганн ва Сафран DC Studios раҳбарлигига келгач, Женкинснинг учинчи фильм бўйича режаларига нуқта қўйилди. Бу эса Гал Гадотнинг франшизадаги келажагини шубҳа остига қўйди. Шунга қарамай, актриса 2023 йил августида берган интервьюсида яна мўжизакор аёл ролига қайтишига ишонишини билдирган.
Изоҳ (0)