Тўрт нафар қизни тарбиялаш ҳатто “Мўжизакор аёл” қаҳрамони учун ҳам осон иш эмас. 39 ёшли актриса Гал Гадот фарзандларни тарбиялаш ва муваффақиятли карьера қуриш билан бирдек шуғулланиб келмоқда. Актриса DuJour нашрига берган интервьюсида бу борадаги қийинчиликлари ҳақида сўзлаб берди.
Бугунги кунда Гал Гадот турмуш ўртоғи — продюсер ва тадбиркор Ярон Версано билан 13 ёшли Алма, 8 ёшли Майя, 3 ёшли Даниэлла ва 1 ёшли Ори тарбияси билан банд. Актрисанинг сўзларига кўра, бугунги кунда тобора ривожланиб бораётган ижтимоий тармоқлар болаларнинг асосий душман бўлиб қолмоқда.
“Ижтимоий тармоқлардаги шиддат билан келадиган маълумотлар, қисқа видеолар, филтрланган суратлар ва сохта ҳаёт тасвири боланинг онгини заҳарлайди, Instagramъда тавсия этилган постлар эса мияни керакcиз маълумотлар билан тўлдиради. Болалар бундай контент филтрланган ва ретушланганини билишмайди. Мен уларга доим барчаси ёлғон эканини айтаман. Қиз бола учун ижтимоий тармоқлар чалкашликка олиб борадиган виртуал дунёдир”, деди актриса.
Гал Гадот кенжа қизининг дунёга келиши айниқса қийин бўлган. Актрисанинг айтишича, ҳомиладорликнинг саккизинчи ойида унинг миясида тромб аниқланган. Малакали шифокорлар уни қутқариш учун барча чораларни кўришга муваффақ бўлган ва хатар ортда қолган.
Эслатиб ўтамиз, Гал Гадот 2024 йилнинг март ойида тўртинчи қизини дунёга келтирган эди. Актриса ушбу қувончли воқеани ижтимоий тармоқларда баҳам кўрди.
Изоҳ (0)