Бразилияда икки ёшли бола отасининг қуролини ўйнаб, тасодифан онасига ўқ узди. Ҳодиса оқибатида 27 ёшли Дебора Родригес вафот этди. Бу ҳақда Daily Mail хабар берди.
Воқеа Рио-Верди-ди-Мату-Гросу муниципалитетида юз берган. Ўқ овозидан сўнг аёл, эҳтимол, шок ҳолатида, ўрнидан туриб танасидаги жароҳатларни кўздан кечирган. У бир неча қадам юриб, йиқилган. Унинг турмуш ўртоғи биринчи ёрдам кўрсатишга уринган. Аёл шифохонага олиб кетилган, бироқ шифокорлар унинг ҳаётини сақлаб қола олмаган.
Маълумотларга кўра, бола стол устида ётган 9 миллиметрли Glock тўппончасини олган. Эр-хотин суҳбатга берилиб кетгани боис қурол қандай қилиб боланинг қўлига тушиб қолганини сезмаган. Аёл болага қараганида ўқ узилган.
Марҳуманинг эри фермер бўлиб, қурол сақлаш учун рухсатномага эга бўлган. Полиция ходимлари эркакка эҳтиётсизлик оқибатида одам ўлдириш моддаси бўйича айблов қўйиши кутилмоқда. Тергов давомида у озодликда қолади. Айни пайтда унга фарзандига қарашга рухсат бериладими ёки бола ижтимоий хизматлар васийлигига топшириладими — бу ҳали номаълум.
Изоҳ (0)