Нафақат Голливудни, балки дунёни ҳам забт этган 7 нафар осиёлик актриса (фото)

Охирги кунларда барчанинг оғзида бир исм — актриса Мишель Йео бир неча кун олдин “Энг яхши аёл роли” учун “Оскар”ни қўлга киритди ва “Оскар”га лойиқ кўрилган биринчи осиёлик аёл бўлди. Бир пайтлар Европа ва Америка фильмларида осиёлик қиёфа чиндан ҳам экзотик эди, шунга қарамай ўша пайтда ҳам Осиё мамлакатлари актрисалари истеъдодлари туфайли катта экранларга чиққан.

Люси Лью

54 ёшли хитойлик актриса (ота-онаси тайванлик) экзотик осиёча қиёфага эга энг машҳур актрисалардан биридир. Люси туғилганидан бери АҚШда яшайди — у Нью-Йоркда туғилиб ўсган, аммо бўлажак актриса инглиз тилини фақат 5 ёшида ўргана бошлаган — унинг оиласи хитой тилида гаплашган.

Люси Мичиган университетининг Осиё тиллари ва маданияти факультетини тамомлаган. Ўқишнинг сўнгги йилларида у “Алиса мўжизалар мамлакатида” спектаклида иштирок этади, шундан сўнг унинг ҳақиқий иши актрисалик эканини англайди. Люси Лос-Анжелесга кўчиб ўтади ва Голливудни забт этишга ҳаракат қила бошлайди, аммо осиёча ташқи кўриниш билан буни уддалаш анча қийин эди. Узоқ вақт давомида у “Элли МакБил” телесериалидаги ёрдамчи роллардан бирига таклиф қилинмагунча эпизодик ролларни ижро этади. 1999 йилда у “Эмми” мукофотининг “Энг яхши ёрдамчи актриса” номинациясига номзод бўлган. Ҳозирда унинг фильмографияси юздан ортиқ ролларни ўз ичига олади.

Сандра О

51 ёшли Сандра О “Эҳтирос анатомияси” ва “Евани ўлдириш” сериалидаги роллари билан танилган, аммо у Голливудга бегона эмас — унинг фильмографиясида юзга яқин роллар мавжуд.

Сандра Онинг ота-онаси корейс бўлиб, у туғилишидан анча олдин Канадага кўчиб келган. Сандра балерина бўлиши мумкин эди, лекин театр санъатига қизиқиб қолади.

2005 йилда Шонда Раймс Сандра Они “Эҳтирос анатомияси” сериалидаги Кристина Янг ролини ўйнашга таклиф қилади. Фильм муваффақиятга эришади — натижада ўн йилликнинг энг кўп муҳокама қилинган ва баҳоланган телевизион лойиҳаларидан бирига айланади. Бу роли учун О 2006 йилда “Телевидениедаги энг яхши иккинчи даражали актриса” номинациясида “Олтин глобус” мукофотини ва 2006 йилда драматик сериалларидаги “Энг яхши актриса” учун Америка актёрлари гилдияси мукофотига сазовор бўлади, шунингдек, беш йил кетма-кет “Энг яхши иккинчи пландаги актриса” учун “Эмми” мукофотига номзод бўлади. 2018 йилнинг 12 июлида у “Евани ўлдириш” фильмидаги роли учун “Драматик сериалларидаги энг яхши актриса” номинациясида “Эмми” мукофотига лойиқ кўрилган биринчи осиёлик актриса бўлиб тарихга киради. Худди шу роли учун у “Олтин глобус” мукофотини ҳам олади.

Жемма Чан

Актриса Буюк Британияда, хитойлик муҳожирлар оиласида туғилган. Болалигидан Жемма турли хил санъат турларига қизиқади, лекин ҳаётини ижод билан боғлаш ҳақида ўйламайди. У Оксфорд университетидаги Вустер коллежининг ҳуқуқ факультетига ўқишга киради. Ўқишни тугатгач, актриса бўлишни хоҳлаётганини тушунади ва Лондондаги драма театри қошидаги актёрлик мактабига ўқишга киришга қарор қилади. Ўқиш билан бир қаторда Чан модель сифатида ишлаган. Дипломни олгандан сўнг Жемма Чан театр ва фильмларда роль ўйнашни бошлайди. Аввалига у асосан телесериалларда (“Доктор Ким”, “Шерлок”, “Одамлар”), кейин эса бадиий фильмларда суратга тушган. Улар орасида “Жоду салтанати”, “Ўта бадавлат осиёликлар”, “Капитан Marvel” фильмлари бор. Жемма бу йил 41 ёшга тўлади.

Гун Ли

Машҳур актрисани хитойлик Мерил Стрип деб аташади, чунки у кучли ва жасур қаҳрамонларни ижро этади. Гун Ли 1965 йилда Шэньян шаҳрида туғилган. Қиз болалигидан рақсга тушишни яхши кўрар, қўшиқчи бўлишни орзу қиларди. 1983 йилда Пекиндаги Марказий драматик санъат академиясига ўқишга киради.

Актриса сифатида у режиссёр Чжан Имоу билан ҳамкорлиги орқасидан халқаро эътирофга сазовор бўлади — Хитой киносини Европа ва Қўшма Штатларда оммалаштиришга ёрдам беради. Гун Ли кўплаб мукофотлар, жумладан, иккита “Олтин хўроз” мукофоти, учта “Юзта гул” мукофоти, АҚШ Миллий кинотанқидчилар кенгаши мукофоти, Берлин, Канн ва Венеция кинофестиваллари совриндори, шунингдек, “Дунё артисти” фахрий унвони соҳибидир. 

Гана Баярсайкан

Мўғул актрисаси ва модели Улан-Батор шаҳрида туғилган. У фаолиятини модель сифатида бошлаган — Schön вa Where журналлари учун суратга тушган. Драматургия бўйича ўқишни тугатгандан сўнг, кастинглардан йиқилмаслик учун нутқи ва интонациясини ривожлантиришга ёрдам берадиган махсус курсда ўқийди.

Гана Голливуд фильмида бош ролни ижро этган биринчи мўғул актрисасидир. Баярсайхон экрандаги дебютини “Машинадан” фильмида андроид Жейд роли билан қилади, у Оскар Айзек, Доналл Глисон ва Алисия Викандер билан бирга ўйнайди. У “Бен-Гур” (2016) ва “Мўжизакор аёл” (2017) фильмларида ҳам иштирок этади. “Варварларни кутиб” фильмида Жонни Депп билан бирга ўйнаган, 2019 йилда 76-Венеция халқаро кинофестивалида мазкур фильмнинг премьераси бўлган. Гананинг фильмографиясида 11 та фильм ва телесериаллардаги роллар мавжуд; у кўпроқ модель сифатида таниқли.

Жан Хе-Жин

Актриса Жанубий Кореянинг Пусан ​​шаҳрида туғилган. Корея Миллий санъат университетининг актёрлик факультетини тамомлаган. У 1998 йилда “Рождествода қор ёғса” фильмида актёрлик дебютини қилган. Умуман олганда, 48 ёшли актрисанинг фильмографияси 30 га яқин фильм ва телесериалларни ўз ичига олади. У 2020 йилда “Энг яхши фильм”, “Энг яхши режиссёр”, “Энг яхши оригинал сценарий” ва “Энг яхши хорижий фильм” номинацияларида “Оскар” мукофотларини қўлга киритган Бон Жун Хонинг “Паразитлар” фильмида бош ролни ижро этганидан кейин бутун дунёга танилди.

Бундай муваффақиятдан сўнг, Жан Хе Жин турли лойиҳаларга, асосан, драмаларга фаол таклиф қилина бошланди.

Жейми Чон

Жейми Чон америкалик корейс оиласида туғилган. У Калифорния университетини тамомлаган ва у ерда иқтисод бўйича таҳсил олган. Унинг кинога бўлган йўли реалити-шоуларда иштирок этиш орқали бошланади. Шундай қилиб, у “Тез ёрдам” ва “Эҳтирос анатомияси” эпизодларида роль ўйнайди.

Чоннинг биринчи асосий роли “Самурай қизи” телесериалида, ундан кейин “Маликани ҳимоя қилиш дастури”, “Аждаҳо марвариди: эволюция”, “Ётоқхонадаги қичқириқ”, “Одноклассники” фильмларидаги роллари бўлган. Бу йил актриса ўзининг 40 ёшини нишонлайди.