Hindistonning Ahmadobod shahridan uchgan yo‘lovchi samolyot shifokorlar hosteliga borib urilib halokatga uchragan. Oqibatda 290 kishi halok bo‘lgan. Bu haqda CNN xabar berdi.
Suratlarda samolyotning dumi binodan chiqib turganini ko‘rish mumkin. Halok bo‘lganlar orasida ham samolyotdagi, ham yerdagi odamlar borligi aytilgan.
Halokat oqibatida Air India aviakompaniyasi samolyoti bortida bo‘lgan 242 kishidan jami 241 nafari halok bo‘ldi, deya xabar bergan. Bitta britaniyalik yo‘lovchi omon qolgani aytilgan.
Halokatga uchragan samolyot Boeing 787-8 Dreamliner ekanligi ochiqlangan. Boeing aviakompaniyasi Air India’ni qo‘llab-quvvatlashga tayyorligini bildirgan. Aviakompaniya rahbari Kelli Ortberg bu halokatdan so‘ng, kelasi hafta bo‘lib o‘tadigan Parij aviasalonida ishtirok etish rejasini bekor qilgan.
Ortbergning so‘zlariga ko‘ra, kompaniya AQSH Transport xavfsizligi milliy kengashi va Hindistonning samolyot halokatlarini tergov byurosini bu ish tergovi jarayonida to‘liq qo‘llab-quvvatlaydi.
Quyidagi videoda samolyot halokatidan keyin vayronalar ostidan chiqib ketayotgan yagona tirik qolgan shaxs aks etgan.
Air India voqea yuzasidan bayonot berdi: “Samolyot bortida bo‘lgan 242 kishidan bittasidan tashqari hammasi halok bo‘lgan. Bortda 230 nafar yo‘lovchi va 12 nafar ekipaj a’zosi bo‘lgan. Yo‘lovchilarning 169 nafari Hindiston, 53 nafari Buyuk Britaniya, 7 nafari Portugaliya va 1 nafari Kanada fuqarolaridir”.
Halokatdan omon qolgan yagona kishi 11A o‘rindiqda o‘tirgan, kelib chiqishi hindistonlik bo‘lgan britaniyalik bo‘lib, u hozirda shifoxonada davolanmoqda. Vishvash Kumar Ramesh ahvoli “yaxshi” ekanini bildirgan. Uning ahvoli “unchalik og‘ir emas” va yaqin bir necha kun ichida qo‘yib yuborilishi mumkin, dedi doktor Rajnish Patel.
Rameshdan halokat haqida nimalarni eslagani so‘ralganida, doktor uning “jarohatdan keyingi amneziya”dan aziyat chekayotganini aytgan.
Hindiston hukumatiga ko‘ra, hodisada Gujarot shtatining sobiq bosh vaziri Vijay Rupani vafot etgani taxmin qilinmoqda. Bundan tashqari yerda ham odamlar halok bo‘lgani aytilgan.
“Bosh vazir Vijay Rupani ham o‘sha yerda bo‘lgani juda achinarli”, dedi Hindiston fuqaro aviatsiyasi ittifoqi vaziri Ram Mohan Naidu Kinjarapu. Aytilishicha, Bosh vazir Narendra Modining Bharatiya Janata partiyasi a’zosi Rupani 2016-yildan 2021-yilgacha Gujarot shtatining bosh vaziri bo‘lib ishlagan.
Tirik qolgan Vishvash Kumar Ramesh reysda akasining yonida o‘tirgan edi, “Ha, har holda, oilasi Rameshning sog‘-salomatligidan xursand”, dedi Angliyadagi oila vakilidan biri Valgi.
Britaniya parlamenti a’zosi halokatdan omon qolgan yolg‘iz insonning oilasi bilan suhbatlashgan.
“Bu mo‘jizadan boshqa narsa emas. Men ularning oilasiga murojaat qildim. Bilganingizdek, uning qarindoshidan biri ham o‘sha reysda bo‘lgan, afsuski, omon qolmagan”, dedi parlamenti a’zosi Shivani Raja.
Butun dunyo tergovchilari 12-iyun kuni halokatga uchragan samolyot bilan bog‘liq vaziyatda nima muammo bo‘lganini aniqlash uchun tekshiruvga jalb qilinishi aytilgan.
AQSH prezidenti Donald Tramp 12-iyun kuni Hindistonda ro‘y bergan aviahalokatdan xavotirda ekanligini bildirib, agar kerak bo‘lsa, AQSH uni qo‘llab-quvvatlashga va’da berishini aytgan.
“Samolyot halokati dahshatli bo‘lgan. Men ularga allaqachon qo‘limizdan nima kelsa, yordam berishimizni aytdim. Hindiston katta va kuchli davlat, ular buni uddalashiga ishonchim komil. Men ularga qo‘limizdan nima kelsa, darhol yetib boramiz, deb aytdim”, dedi Tramp.
Hindiston tibbiyot assotsiatsiyasi federatsiyasining ma’lum qilishicha, Air India samolyoti binoga qulaganidan keyin 50 dan 60 gacha talaba mahalliy kasalxonalarga yotqizilgan. 4-5 nafar talaba bedarak yo‘qolgan, yana 2-3 nafari jonlantirish bo‘limidaligi bildirilgan.
Londonning Gatvik aeroportida halokatga uchragan samolyot yo‘lovchilarining qarindoshlari uchun qabulxona tashkil etilgan. U jabrlanganlarning qarindoshlariga ma’lumot va yordam beradi.
“Konsullik yordamiga muhtoj bo‘lgan yoki do‘stlari yoki oilasi haqida xavotirda bo‘lgan Britaniya fuqarolari 020 7008 5000 raqamiga qo‘ng‘iroq qilishlari mumkin”, deyiladi aeroportning ijtimoiy tarmoqlardagi sahifasida.
Izoh (0)