Бухоро вилоятида чавандозлар маҳорат мактаби ўз фаолиятини бошлади, дея хабар берди «Дарё» мухбири.
Спорт якка кураши бўйича ихтисослаштирилган болалар-ўсмирлар спорт мактаби балансидаги «Отчопар» спорт мажмуасида иш бошлаган чавандозлар мактаби Бухоро туманидаги «Шейхонча» маҳалла фуқаролар йиғинида жойлашган бўлиб, Миллий гвардиянинг вилоят бошқармаси тасарруфига киритилган.
«Мактаб президентимизнинг 2021 йил 11 мартдаги ‘Йилқичилик ва от спортини янада ривожлантириш ҳамда замонавий беш кураш ва поло спорт турини оммалаштириш бўйича қўшимча чора-тадбирлар тўғрисида’ги ҳамда 2021 йил 5 августдаги ‘Чавандозлар мактаблари фаолиятини ташкил этиш чора-тадбирлари тўғрисида’ги қарорлари асосида барпо этилган. ‘Отчопар’ базаси 1986 йилда қурилган бўлиб, умумий майдони 12,8 гектардан иборат. 7,5 гектари экинга, 1,2 гектари машғулотлар ўтказишга мўлжалланган. Бу ерда замонавий дренаж тизимига эга очиқ ва ёпиқ манежлар қад ростлаган бўлиб, барча керакли жиҳозлар билан таъминланган. Иншоот майдони Қоровулбозор туманидаги Гаванна чўлидан келтирилган қум билан қопланган. Мажмуа нафақат миллий, балки халқаро даражадаги мусобақаларни ҳам ўтказишга тайёр», — дейди мактаб директори Фарҳод Саъдуллаев.
«Отчопар» иншооти «Спорт объектлари инфратузилмасини ривожлантириш бўйича инжиниринг компанияси» давлат унитар корхонаси буюртмасига кўра, 2021 йил 5 миллиард сўм маблағ эвазига қурилган бўлиб, машғулотлар ва мусобақалар ўтказиладиган ёзги манеж, томошабинлар учун эса 600 ўринли айвондан иборат.
Директорнинг айтишича, мактабда 11 турдаги 34 бош зотли от бўлиб, улар Италия ва Испаниядан келтирилган.
«Айни пайтда мактабда 100 нафардан ортиқ ёш чавандозлар тайёрланмоқда. Тарихга назар ташласак, Бухорода чавандозлик маҳорати минг йилларга бориб тақалади. Чавандозларимиз Италия, Франция, Испания, Австрия каби давлатларда ўтказилган мусобақаларда пешқадам бўлган», — дейди Фарҳод Саъдуллаев.
Миллий гвардиянинг вилоят бошқармаси ахборот хизмати раҳбари Муроджон Раҳматуллаевнинг билдиришича, вилоятда яна 25 бош отга мўлжалланган карантин зона, ёпиқ манеж, шу жумладан, жанговар манеж, отларни қадамлаш учун жой (шагалка) ҳам барпо этилади.
Изоҳ (0)