Тожикистон президенти Эмомали Раҳмон ва Россия президенти Владимир Путин телефон орқали бўлган суҳбат чоғида мамлакатлар ўртасидаги товар айирбошлашни ошириш ниятларини билдирди ва миграция соҳасидаги вазиятни муҳокама қилди. Бу ҳақда Тожикистон президентининг матбуот хизматига таяниб «ТАСС» хабар берди.
«Томонлар ўзаро савдо ҳажмини ошириш ва Тожикистондан Россия бозорига табиий тоза мева ва сабзавотларни экспорт қилиш ниятларини билдирди ва яқин келажакда тожикистонлик меҳнат муҳожирлари учун навбатдаги ‘миграция амнистияси’ ўтказилишини муҳокама қилди», — дейилади хабарда.
Шунингдек, томонлар Тожикистонда бешта рус тилида ўқитиладиган мактаб қуриш, Россия олий ўқув юртларида тожикистонлик талабаларнинг кундузги таълимини тиклаш ҳамда мамлакатлар ўртасидаги мунтазам авиақатновларни кўпайтириш масалаларини муҳокама қилди.
Аввалроқ Кремль матбуот хизмати Путин ва Раҳмоннинг интеграцион бирлашмалар доирасидаги қўшма ишларни ва Марказий Осиё минтақасидаги вазиятни кўриб чиққанини маълум қилган эди.
21 апрель куни Россия Ташқи ишлар вазирлиги Миграция масалалари бўйича бош бошқармаси раҳбари Валентина Казакова 2021 йилда Тожикистон ва Россия миграция соҳасини тартибга солиш билан боғлиқ ҳужжатларни имзолашни режалаштираётганини маълум қилди. Тожикистон ҳукуматининг маълумотларига кўра, ҳар йили ўртача 460 мингга яқин аҳоли ишлаш учун мамлакатни тарк этиб, уларнинг кўпчилиги Россияга боради. 2020 йилда Россиядаги коронавирус пандемияси сабабли у ерга фақат 120 минг киши меҳнат муҳожири сифатида кетган. 2021 йилга келиб Россия чет элликларнинг мамлакатга киришини чеклаб қўйганида, 30 январь куни 170 нафар Тожикистон фуқароси махсус ёлланиб, Иркутск вилоятига, 31 март куни 168 киши Москва вилоятига ишлаш учун кетган.
2020 йилнинг декабрь ойида Россиянинг Тожикистондаги элчиси Игорь Якин-Фролов 2020 йилнинг дастлабки 10 ойида мамлакатлар ўртасидаги товар айирбошлаш ҳажми 850 миллион долларни ташкил этганини маълум қилган эди. Шунингдек, у ўзаро савдо таркибида биринчи ўринни ёқилғи-мойлаш материаллари, ундан кейин озиқ-овқат, қурилиш материаллари, металлар, ёғоч, асбоб-ускуналар, шу жумладан, қишлоқ хўжалиги маҳсулотлари эгаллаб турганини таъкидлаган.
Аввалроқ АҚШ президенти Жо Байден Россия давлат раҳбари Владимир Путин билан телефон орқали мулоқот қилган эди. Унда президентлар стратегик барқарорлик, глобал ва минтақавий масалаларни гаплашган.
Икки президентнинг телефондаги суҳбати Байден ABC News журналистининг «Путинни қотил деб ҳисоблаш мумкинми?» қабилида берган саволига «Ҳа» деб жавоб берганидан кейин биринчи мулоқот бўлди.
АҚШ президенти россиялик ҳамкасбига яқин ойлар ичида учинчи бир мамлакатда саммит ўтказишни таклиф қилди. Австрия эса учрашув майдони бўлишга тайёрлигини билдирди.
Изоҳ (0)