Германия канцлери Ангела Меркелнинг айтишича, мамлакатда коронавирус эпидемиясининг учинчи тўлқини юз бермоқда. Бу ҳақда Меркель Консерватив партия аъзолари билан учрашувда айтиб ўтди, деб ёзмоқда «Korrespondent.net».
«Биз ҳозир пандемиянинг учинчи тўлқинини бошдан кечиряпмиз», — деди Меркель ҳамда карантиннинг ҳар қандай тарзда юмшатилиши эҳтиёткорлик билан ва босқичма-босқич амалга оширилиши кераклиги ҳақида огоҳлантирди.
Хусусан, вируснинг юқумлироқ турига чалиниш ҳолатлари авж олган Австрия ва Чехия билан боғлиқ барча иккиламчи корхоналар ва чегаралар ёпилишини назоратга олиш Германия учун COVID-19’нинг кунлик ўсишини камайтиришда ёрдам берган. Шу билан бирга, эмлаш суръатининг пастлиги ва Германияда аниқланган янги штаммларнинг кенг тарқалиш хавфи чекловларнинг ҳар қандай тарзда юмшатилишини қийинлаштириши мумкин.
«Биз пандемиянинг кетма-кет тўлқинларига дош беролмаймиз», — дея таъкидлади канцлер.
Ангела Меркель агар инфекцияланиш ҳолати яна орта бошласа, қайтадан карантин жорий қилмаслик учун нормал ҳаётга қайтиш масаласи эҳтиёткорлик билан ҳал қилиниши тарафдорилигини билдирди.
Меркель чекловларни юмшатиш мумкин бўлган учта йўналишни алоҳида таъкидлади. Булар — шахсий мулоқот доираси, мактаб ҳамда касб-ҳунар коллежлари, шунингдек, маданият, ресторан ва спорт. Шу билан бирга, канцлер аҳолини ҳушёрликни сусайтирмасликка чақирди.
Жонс Ҳопкинс университети маълумотларига кўра, Германияда пандемия бошидан бери 2,4 миллион киши коронавирусга чалинган, 68,7 минг киши касалликдан вафот этган.
Бундан аввал Ангела Меркель инсоният қандай шарт билан коронавирус устидан ғалаба қозонишини маълум қилгани ҳамда Германия карантин чекловларини 7 мартгача узайтиргани ҳақида хабар берилганди.
Изоҳ (0)