Тошкент вилояти Қибрай туманида қарийб бир ой аввал бедарак йўқолган қиз ўлик ҳолда топилди. Бу ҳақда Бош прокуратура “Дарё”га хабар берди.
Унда айтилишича, 2025 йил 10 май куни Қибрай тумани, Ботаника МФЙда яшовчи 2001 йилда туғилган О.Б. ўз уйидан номаълум томонга чиқиб кетиб, бедарак йўқолган.
Олиб борилган тезкор-қидирув ҳаракатлари натижасида 2 июнь куни Қибрай тумани, “Соҳибкор” МФЙ, Ифор кўчасидаги 11-сонли ГЭСнинг ахлат йиғиладиган ковшидан унинг мурдаси тан жароҳатларсиз топилди.
Суд тиббий экспертизасининг маълумотномасига кўра аёлнинг ўлими юқори нафас йўлларини суюқлик (сув) билан беркилишидан келиб чиққан механик асфиксия сабаб бўлгани қайд этилган. Мазкур ҳолат юзасидан Қибрай туман прокуратураси томонидан терговга қадар текширув ҳаракатлари олиб борилмоқда ва натижаси бўйича қонуний қарор қабул қилиниши таъминланади.
Бундан аввал Тошкентнинг Бўрижар каналига тушиб кетган қизни қутқарган эркакнинг ўзи ҳалок бўлгани хабар қилинганди. Шунингдек, Фарғонада уч нафар вояга етмаган бола сунъий сув ҳавзасига чўкиб кетган эди.
Шу билан бирга, Сирдарё вилояти Мирзаобод туманида 14 ёшли мактаб ўқувчиси каналда чўкиб кетган эди.
Сувда чўкишнинг олдини олиш: Ўзбекистонда қандай чоралар кўрилмоқда?
Фавқулодда вазиятлар вазирлиги томонидан ёз мавсумида сувда чўкиш ҳолатларининг олдини олиш мақсадида кенг кўламли профилактик тадбирлар олиб борилмоқда. Тегишли мутахассислар иштирокида ўтказилган ўрганишлар натижасида республика бўйлаб 2 004 та чўмилиш тақиқланган сув объектлари аниқланиб, улар рўйхатга олинди ва назоратга олинди.
Шунингдек:
- 1 422 та кўприк, магистрал ичимлик суви ва газ қувурлари ҳамда бошқа хавфли иншоотлар аниқланиб, шундан 1 047 таси бартараф этилди;
- Сув ҳавзалари бўйича 6 543 та профилактик тадбир ўтказилиб, 212 808 нафар ёшларга йўриқномалар берилди, 395 991 нафар фуқаро суҳбат ва тушунтириш ишларига жалб қилинди;
- Таълим муассасаларида 997 205 нафар ўқувчи ва талабаларга махсус кўрсатмалар берилди, 222 347 дона эслатма ва буклетлар тарқатилди;
- Чўмилиш тақиқланган ҳудудларда 7 112 маротаба рейд тадбирлари ўтказилди;
- Республикада 9 056 та “Чўмилиш қатъий тақиқланади!” белгиси ўрнатилди.
Бундан ташқари, 6 535 та сунъий сув ҳавзалари (асосан томчилаб суғориш учун мўлжалланган) ўрганилиб, улардан 3 640 тасининг атрофи очиқ (ўралмаган) экани аниқланган. Натижада 1 794 таси ўраб, 2 262 тасига хавфсизлик чоралари (арқон, чиқиш мосламалари) ўрнатилди.
Фавқулодда вазиятлар вазирлиги фуқаролардан тақиқланган жойларда чўмилмаслик, болаларнинг сув ҳавзалари яқинида назоратсиз қолмаслигини таъминлашни қатъий сўрамоқда.
Изоҳ (0)