Дунёга машҳур “Калмар ўйини” сериалининг муаллифи Ҳван Дон Хек финал мавсуми устида ишлаш чоғида кучли стресс туфайли яна икки тишини йўқотди. Режиссёр бу ҳақда Entertainment Weekly нашрига берган интервьюсида маълум қилди.
Муаллифнинг сўзларига кўра, учинчи мавсумни суратга олиш жараёни жисмонан ва руҳан жуда оғир кечган.
Ҳаммаси яхши бўлади деб ўйлагандим, аммо бу сафар яна икки тишимни олдиришимга тўғри келди. Биринчи мавсумда саккизта тишимни йўқотган эдим. Энди эса жами ўнта тишим йўқ, дейди режиссёр.
Шунга қарамай, у иккинчи ва учинчи мавсум устида ишлаш бир оз осонроқ бўлганини таъкидлади. Сабаби сериал учун яратилган дунё ва декорациялар аллақачон мавжуд эди. Бироқ бир вақтнинг ўзида сценарий ёзиш ва суратга олиш босқичлари катта куч талаб қилган.
Иккинчи ва учинчи фаслларни бир вақтнинг ўзида тасвирга олдик. Бу гўё битта катта мавсумни суратга олаётгандек эди. Тезроқ чиқариш учун бор кучимизни ишга солдик, дейди Ҳван.
Режиссёрнинг айтишича, финал мавсумда инсон табиатининг энг тубан қирраларини кўрсатишга ҳаракат қилган. Ҳозирда эса у соғлиғига жиддий эътибор қаратишни режалаштирмоқда.
Маълумот учун, “Калмар ўйини” сериалининг 2-мавсуми 2024 йил 26 декабрда чиққан. 3-мавсум премераси эса 2025 йил 27 июнга белгиланган. Бош қаҳрамон Сон Ги Хун (456-иштирокчи) ўйинга қайтиб, уни бутунлай тўхтатишга ҳаракат қилади.
Изоҳ (0)