Dunyoga mashhur “Kalmar o‘yini” serialining muallifi Hvan Don Xek final mavsumi ustida ishlash chog‘ida kuchli stress tufayli yana ikki tishini yo‘qotdi. Rejissyor bu haqda Entertainment Weekly nashriga bergan intervyusida ma’lum qildi.
Muallifning so‘zlariga ko‘ra, uchinchi mavsumni suratga olish jarayoni jismonan va ruhan juda og‘ir kechgan.
Hammasi yaxshi bo‘ladi deb o‘ylagandim, ammo bu safar yana ikki tishimni oldirishimga to‘g‘ri keldi. Birinchi mavsumda sakkizta tishimni yo‘qotgan edim. Endi esa jami o‘nta tishim yo‘q, deydi rejissyor.
Shunga qaramay, u ikkinchi va uchinchi mavsum ustida ishlash biroz osonroq bo‘lganini ta’kidladi. Sababi serial uchun yaratilgan dunyo va dekoratsiyalar allaqachon mavjud edi. Biroq bir vaqtning o‘zida ssenariy yozish va suratga olish bosqichlari katta kuch talab qilgan.
Ikkinchi va uchinchi fasllarni bir vaqtning o‘zida tasvirga oldik. Bu go‘yo bitta katta mavsumni suratga olayotgandek edi. Tezroq chiqarish uchun bor kuchimizni ishga soldik, deydi Hvan.
Rejissyorning aytishicha, final mavsumda inson tabiatining eng tuban qirralarini ko‘rsatishga harakat qilgan. Hozirda esa u sog‘lig‘iga jiddiy e’tibor qaratishni rejalashtirmoqda.
Ma’lumot uchun, “Kalmar o‘yini” serialining 2-mavsumi 2024-yil 26-dekabrda chiqqan. 3-mavsum premyerasi esa 2025-yil 27-iyunga belgilangan. Bosh qahramon Son Gi Xun (456-ishtirokchi) o‘yinga qaytib, uni butunlay to‘xtatishga harakat qiladi.
Izoh (0)