Сериал муаллифи Хван Дон Хёк IndieWire нашрига берган интервьюсида “Калмар ўйини” лойиҳасининг спин-оффи бўйича янги ғояси борлигини маълум қилди.
Кинорежиссёрнинг айтишича, у сериал қаҳрамонларининг биринчи ва иккинчи мавсум воқеалари оралиғидаги ҳаёти ҳақида ҳикоя қилишни истайди:
“Биринчи ва иккинчи мавсум оралиғида уч йиллик танаффус бор. Спин-офф версияда қаҳрамонларнинг ҳаёти шу вақт ичида қандай кечганини кўрсатмоқчиман”, деди у.
Хван Дон Хёкнинг таъкидлашича, иккинчи ва учинчи мавсум бўйича ғоялар режиссёрга биринчи қисм тугагач келган.
“Калмар ўйини”нинг учинчи мавсуми 27 июнь куни Netflix платформасида намойиш этилади. Сериал иккинчи мавсумдаги воқеаларнинг давомига уланади ва омон қолган ўйинчиларнинг муваффақиятсиз қўзғолондан кейинги тақдирини ёритади.
Хван Дон Хёк навбатдаги эпизодларда томошабинларни чинакам қўрқувга соладиган янги ўйинлар кутаётганини ваъда қилди. Унда қаҳрамонлар ҳеч ким бажаришни истамаган ишларни қилишга мажбур қилинади.
“Мен одамларнинг энг пасткаш сифатларини очиб бера оладиган ўйинларни тасвирлашни истадим, чунки сериал ўзининг кулминациясига яқинлашмоқда”, дея изоҳ берди у.
Изоҳ (0)